नेवाः पत्रकार राष्ट्रिय दबू् येँ जिल्ला स्वक्वःगु तःमूज्यां अरबिन्द मान सिंहया नायःसुइ न्हूगु ज्यासना पुच गठन याःगु दु ।
नायः जुइधुंका सिंहं दुजःपिनिगु भिं तातुना उमिगु क्षमता अभिवृद्धि, स्वास्थउपचार, बीमालिसें श्रमजीवि पत्रकारया अधिकारया नीतिं सः थ्वयेकेगु ताःतुना दूगु न्ह्यथनादिल । मातृभाषा पत्रिकाया बर्गीकरण समयसापेक्ष जुइमाःगु खँय् सम्बन्धित निकायतक थ्यंकेगु आज्जू कयागु न्हूम्ह नायः सिंहं नेवाः न्यूगयात न्ह्यथनादीगु दु ।
येँ महानगरपालिकाया प्रमुख मेयर विद्या सुन्दर शाक्यया मूपाहाँसुइ दबुया निवर्तमान नायः नातिकाजी महर्जनया नायःसुइ शनिबाः न्याक्वःगु दँमूज्या व स्वक्वःगु तःमूज्या जूगु खः ।
तःमुँज्याय् मेयर शाक्यं दबुया ज्याकु भवनया नितिं फूचाःगु ग्वाहालि याइगु व न्यागु लखया अक्षय काेषया नितिं कुतःयायेगु बचं बियादिल ।
ज्याझ्वलय् विशेष पाहाँकथं वरिष्ठ फोटो पत्रकार गोपाल चित्रकार, पाहाँपिं प्रदेश सभासद राजेश शाक्य, जीवन डंगोल व केन्द्रीय नायः श्रीकृष्ण महर्जन झायादीगु खः ।
ज्याझ्वलय् पुलांम्ह नायः महर्जनया हनाबना धुंका वयेकलं छगू लख व नीन्याद्वःतका दांया विष्णु नाति फोटो पत्रकारिता सिरपाः कोष थापना यानादिल । काेषया नायः कथं दानदास श्रेष्ठया लयेज्या जूगु दु ।
न्हूगु ज्यासना पुचलय् न्वकू प्रवीण महर्जन प्रजापति, छ्याञ्जे रत्नकाजी महर्जन, ल्यू छ्याञ्जे शरण डंगोल व बिनिता खड्गी, दांभरिं राजेन्द्र मानन्धर ‘नीलः’ ल्ययेज्या जूगु दुसा दुजःकथं शैलेश कुमार डंगोल, राजेन्द्र मानन्धर, रेखा शाक्य, रोजिता बुद्धाचार्य, मनोजरत्न शाही, बिजय कुमार सिंह, सहयोग रञ्जित, किचः सिंह ज्यापु व विमला मानन्धरपिं ल्यःगु दु ।
ज्याझ्वलय् दबुया पुलांम्ह छ्याञ्जे प्रजित शाक्यं लसकुस न्वचू बियादीगु खःसा न्हूम्ह दुजः रेखा शाक्यं ज्याझ्वः न्ह्यथाकादीगु खः ।
छ्याता
फेसबुक छ्याता