लिच्यूगु स्वचेतना


प्रज्वल शाक्य
चिबाखँ

थौंकन्हे नेवाःतय् स्वचेतना वयाच्वंगु दु । आकृति नं थौंकन्हे नेवाः सँस्कृति प्रति आकर्षित जुयाच्वंगु दु । झीगु सँस्कृति बुलुहुँ तनावनाच्वन, सिनाच्वन धका व खनाच्वन । थुकियात म्वाकेत व नं जागरुक जुयाच्वन । पासापिं नाप नेपाली खँ ल्हाइम्ह व थौंकन्हे नेपालभाषां खँ ल्हाय्मा धका धाय् सय् धुंकल । न्हापा न्ह्याबलें अँग्रेजी भाषं फेसबुकय् च्वइम्ह थौंकन्हे नेपालभाषां च्वइ । अले पासापिनि कमेन्ट सुरु जुइ । ख ख मखु मखु । वया न्ह्यइपुसे च्वं । मथु धका च्वइपिं तन्न । वयांलिपा वं नेपालीं नं उल्था याना कमेन्ट यायेगु सुरु यात । कलेज वना वय् साथ वया सँस्कृति, भाषा लिसे माया मतिना दूगु पोष्ट वइगु । कमेन्टय् वयात ययेकुपिं अप्व दूथें वयात पासा दयेकिपिं नं ग्वा ग्वा जुयावल ।

नेपालभाषा भावनां सयेकुम्ह आकृतिया कविता ब्वने खुब यः । नेपालभाषाया सफू गन दु न्यनेकने याना सीका बाखँ, उपन्यास, साहित्य थीथी ब्वनेगु याना वयाच्वम्ह आकृतिया छन्हु बिचा वल, कविता छगु च्वय् । कुतः याना स्वय् धका वं च्वल ।

सँस्कृती झिगु धन ख
म्हसीका ल्यँकेगु पहः ख
जिगु देः जिगुु गौरव
जि म्वानाच्वंगु चिँ खः ।

उकि पुलांगु किपा छपा नं तयाः पोष्ट यात ।
लाइक वल, कमेन्ट वल । कमेन्ट लाइक ला वःगु हे दु नि । स्वय् छुछु कमेन्ट वल धका स्वल ।

वाऊ । क्या बात ।
झीगु जुइमा, झिगु धागु दश ।
भाव ठिक जू । शब्द मिलेमजू ।
व्याकरण मिले मजुल ।
नेपालभाषा च्वय् बलय् बिचा यायेमा
च्वय् मसःसा मच्वंसां ज्यू ।

छम्ह च्वकानायःया कमेन्त वल नेपालभाषा नि ब्वना वा । फेसबुकय् मसः मसः च्वया बदनाम यायेमते ।
अले सुरु जुल मनुतय् नेगेतिभ कमेन्त ।

आकृति अवाक । सुरुइ लिसः बीला थें जुल । हानं यक्व हे थज्यागु कमेन्ट सुरु जुया सुयात निं कमेन्ट यायेगु धका मती वल । गुलि बांला धका वया फोटोया तारिफ याइपिंसं थौं वया बारे गुलि बामलाक च्वल । व ला छथुं सिमां कुतुं वम्ह थें जुल ।

कमेन्ट यानां जक मगाः छम्ह निम्ह जाग्वारा तयेसं मेसेजय् तकं ब्व बी थें च्वंक च्वयाहल । ओहो । तधंगु हे पाप याये लात ।आकृति तसकं आत्ते जुल । न्ह्याबलें बांबालागु खँ ब्वने दयाच्वंगु वया छक्वलं बामलाःगु खँ ब्वनेमाला छकला फेसबुक हे डिएक्टिबेट यायेला थें जुल ।

अले छम्ह पासां सल्ला बिल मेसेय् । स्टेटस हुया छ्व । तसकं बामलाक्क कमेन्ट वयाच्वन ।

कृतिं स्वइ । २०० नोटिफिकेसन । का मयेल । आः नेपालभाषां ल्वमंसें नं स्टाटस तय् मखुत । कृति मनमनं प्रण याइ । स्टाटस हुया छ्वइ । ट्वांग नोटिफिकेसन वइ । पुलांगु फोटोय् कमेन्ट वःगु जुयाच्वन । मनुला नेवाः खनि । नेवाः भाय् मसःला? फोटो क्याप्सन छाय् नेपाली ?

Share on Google Plus

News: Newa News

    छ्याता
    फेसबुक छ्याता