२०७२या तःभुखाचं स्यंगु हनुमानध्वाखा दरवारक्षेत्र विश्व सम्पदास्थलय् अवस्थित जगन्नाथ व श्रीकृष्ण महाविष्णु (गोपीनाथ) देगः पुनःस्थापना ज्या युनेस्काें लिचिउगु दु ।
नेपालया नितिं युनेस्कोया प्रतिनिधि क्रिश्चियन म्यानहार्टया कथं ‟भ्वखाय् धुंका नेपालया सम्पदायात संरक्षणया अन्तर्राष्ट्रिय सिद्धान्त नापं मापदण्ड कथं पुनःस्थापना यायेगु ज्याय् सरकारयात ग्वाहालि याये कथं स्वनिगःया विश्वसम्पदा स्थलदुनेया थ्व निगु महत्वंजाःगु देगःया पुनःस्थापना परियोजनापाखें लिचिलेमाला युनेस्को यें ज्याकु तसकं दुःखी जूगु दु।”
युनेस्कों उगु पुनःस्थापना ज्या पुरातत्व विभागया निकट साझेदारीइ जापान सरकार व नेपाल इन्भेस्टमेन्ट बैंक लिमिटेडया आर्थिक ग्वाहालिइ सञ्चालन यायेत्यंगु खः । क्षति आँकलनया रेखाङ्कन यायेत, पुरातात्विक महत्वया वस्तुया अभिलेखिकरण यायेत, संरचनागत विश्लेषण, जगया पुरातात्विक अनुसन्धान, व देगःया विस्तृत रेट्रोफिटिङ डिजाइन तयार यायेगु ज्या पुरातत्व विभाग, वडा ज्याकुया कर्मचारीपिं, स्थानीय समुदाय व पुजारीपिनिगु परामर्श नापं स्थानीय संरक्षणविदपिनिगु पुचलं याःगु खः । देगः आंशिक भागय् जक क्षति जुगुलिं देगःया रेट्रोफिटिङ यायेगु प्राविधिक ज्या थाकुगु धापु दु । गोपीनाथ देगःया क्वयेया तल्लाया पःखाया तकं देकेज्याया झ्वलय् देगःयात पुवंक हे टेका तयेमालि । युनेस्कों तयार याःगु डिजाइनं मौलिक संरचना व उकि छ्यःगु सामाग्रीयात संरक्षण यायेगु नापं निगुलिं देगःयात भविष्यय् वय् फइगु भ्वखाचं तकं असर मलाइ कथं देकेत स्वःगु खः ।
पुनःस्थापना ज्या १० डिसेम्वर २०१८ य् न्ह्याःगु खः । थ्व हे झ्वलय् थुगु क्षेत्र नं ८ पाखें निर्वाचित प्रदेश ३ सांसद राजेश शाक्यया लेटर प्याडय् ज्या दिकेत उजं ब्यूगु खः ।
अन्तर्राष्ट्रिय ग्वाहालिया पलेसा थःगुहे स्थानीय आर्थिक स्रोतय् देगःत पुनःस्थापना यायेगु स्थानीय समुदायया इच्छायात क्यंसें हनुमानध्वाखा दरबार संरक्षण समितियात ब्यूगु पाैया दवाबया कारण २३ डिसेम्वरय् उगु पुनःस्थापना ज्या दिकुगु खः । थुकियात सम्बोधन यासें युनेस्कों सम्बन्धित स्थानीय समुदायया दुजःपिं, संस्कृति, पर्यटन नापं नागरिक उड्ययन मन्त्रालय, राष्ट्रिय पुनःनिर्माण प्राधिकरण, पुरातत्व विभाग, प्रदेश ३ या प्रदेशसभा सांसद राजेश शाक्यनाप क्रमबद्धरूपं मुँज्या च्वना १५ मे २०१९ निसें पुनःस्थापना ज्या हाकनं न्ह्याःगु खः ।
तर छुं दिं लिपा हे कार्यस्थलय् ज्या याइपिं पुनःस्थापनाकर्मीपिंत ख्याच्वः वःगुलिं युनेस्कों उगु परियोजना बन्द याःगु खः । विश्व सम्पदा स्थलया नितिं माःगु अन्तर्राष्ट्रिय मापदण्ड कथं क्वचायेकेत पुनःस्थापना ज्या नाप सम्बन्धित फुक्क कागजपत्रत पुरातत्व विभागयात तकं हस्तान्तरण यायेधुंकुगु दु ।
अजरवैजानया बाकूइ न्ह्यानाच्वंगु विश्व सम्पदा समितिया मुँज्याया झ्वलय् ४ जुलाई २०१९ य् स्वनिगःया सम्पदा स्थलया पुनःस्थापना ज्याय् जुयाच्वंगु प्रगतिया बारे न्यंगु दु । थुकि सुधार यायेत दछिया इ ब्यूसें समितिं स्वनिगःया खतराया धलखय् मतयेगु निर्णय याःगु दु । नेपाःया साँस्कृतिक सम्पदा स्थलया पुनःस्थापना नापं संरक्षणय् ग्वाहालि यायेगु ज्याय् युनेस्को न्ह्यावनाच्वनीगु विज्ञप्तिइ उल्लेख यानातःगु दु ।
छ्याता
फेसबुक छ्याता