यल महानगरपालिका विवादय् ,पुखु देकेमाःगु सः तम्ह प्रहरी प्रमुखया जागिर चत (भिडियाे नापं)



सर्वाेच्च अदालत‌ं तकं पुखु दयेकेमाः धका उजं ब्यूसां दयेके मफूगु पलेस्वाँ पुखुया जग्गाय् यल महानगरपालिकाया ज्याकू लानाच्वंगु दु । महानगरपालिकाया नापसं च्वंगु खालि जग्गाय् न्हापा थें पुखु दयेकेमा धका स्थानियवासीत कुहाँ वःगु दु । थ्व झ्वलय् स्थानियपिनि आन्दाेलनं याना महानगरपालिकाया जागिर नयाच्वंम्ह कर्मचारी निलम्बनय् लाःगु दु ।

यल पूच्वया अशोक स्तुपया न्ह्यःने यल महानगरपालिका लानाच्वंगु दु । थ्व पुखुया जग्गा खः । मेगु पुखुलिइ त्रिपद्म माध्यमिक ब्वनेकुथि दयेकातःगु दु । मेगुलि गाडी पार्किङ याकातःगु दु । महानगर छेंया लिउने चिकिचाधंगु स्विमिङ पुल थें जाःगु पुखु धासा महानगरं दयेकातःगु दु ।

लगंख्यःया सप्तपाताल पुखु हाकनं दयेकीगु हाैसला नापं क्वाःगु पूच्वःया स्थानियवासीपिंसं पलेस्वां पुखु दयेकेत सुशील श्रेष्ठया नायःसुइ संघर्ष समिति निस्वन । त्वाःया सकल वासीया इच्छा कथं त्वाः नायः कदमलाल महर्जन नं थुगु आन्दाेलनय् कुहाँ वल । तर यल महानगरपालिका, प्रहरी प्रमुख तकं जुयादिम्ह महर्जनयात महानगरं आन्दाेलनय् क्वाहाँ वंगुलिं निलम्बन यानाबिल । थः स्थानिय नातां पुखु दयेकेमाःगु पक्षय् दूगु तर आन्दाेलनय् थः प्रत्यक्ष मवंसां महानगरं कुनेगु ख्याच्वः तकं ब्यूगु व निलम्बन याःगु न्ह्यथनादिल ।

महानगरपालिकाया ज्याकु दुथाय् २०१२ सालय् पुखु त्वपूगु जुयाच्वन । २०४४ सालय् नगरपालिकाया नितिं ज्याकु दयेकल ।

नःत्वाः पलेस्वाँ पुखु संरक्षण समिति तकं दयेका आन्दाेलनय् कुहाँ वयाच्वंपिं स्थानिय वासिन्दां पुखु न्हापा थें देकेमाःगु माग याःगु दु ।

आः बसपार्क दुगु थासय् पुखु दयेकेत उबलय् नगरपञ्चायत सभा २०२६ पाखें उजं तकं वःगु जुयाच्वन । थ्व विरुद्ध सर्वोच्च अदालतय् तःगु रितय् २०२९ सालय् सर्वोच्चं तकं पुखु दयेकेत उजं ब्यूगु जुयाच्वन ।

पुखु दयेके मफूगुलिं बुलुहुँ 'डम्पिङ साइट' कथं जूवंगु थुगु थाय् आः सुचुकुचु याना बसपार्कय् हिलाच्वंगु दु ।

पुखु दयेकेत ताकेता याःसा २०५४ सालय् सभागृह दयेकेत स्वःगु व शिलान्यास तकं याःसां स्थानीयया विराेधं दयेके मफूगु खः ।

पुखु दयेकेगु बजेत मगाःतले थुकियात अल्पकालीन पार्किङ देकेगु ज्या जुल । तर आः थ्व थाय् यात महानगरपालिकां लछिया छगु लख ६१ द्व तकाय् न्यादँया नितिं ठेक्का ब्यूगु दु ।
थुखे स्थानीय पुचलं पुखु थःपिंसं देकेगु धका साउन १ गते शिलान्यास हे यात ।

थ्व विषयलय् महानगर प्रमुख चिरिबाबु महर्जनं पार्किङ टेन्डर न्हापा नःत्वाः खलःया स्थानीययात बियागु तर आः अहिले टेन्डरया इ क्वचाया मेम्हेसित लाःगुलिं पुखुया विवाद हःगु न्ह्यथनादिल ।

ठेक्का थःपिंके दतले सुम्क च्वंपिं ठेक्का मेपिंत लाय्वं आन्दाेलनय् कुहाँ वःगु वयेकया द्वपं दु ।

मेयर महर्जनया कथं पुखु दयेकेत अध्ययन याना नक्सा निसेंया फुक्क योजना देकेमाःगु जुगुलिं इ काइगु न्ह्यथनादिल ।

महानगरपालिकां स्थानीययात उक्सेयाःगु धासें नगर प्रहरी प्रमुख कदमलाल महर्जन निलम्बन याःगु दु ।

पुखु दयेकेमा धका माग यासें स्थानीय गुन्हुतक धर्ना तकं च्वंगु दु ।



Video: Bigen Tuladhar
Share on Google Plus

News: Newa News

    छ्याता
    फेसबुक छ्याता