तिलोत्तमा नगरपालिकाय् लाइगु ६ गु लेन सतकया डिभाइडरय् ब्वयातःगु बुद्धया झ्वातायात वंगु बुधबाः बहनी म्हमस्युपिं मनुतयेसं तछ्याना वाँछ्वःसां आःतक दाेषी ज्वने मफुनि ।
प्रहरीं आःतक अपराधी सीके मफया न्ह्यसःत ब्वलंगु दु । फुक्क पक्षं संयमित मजूसा थुगु घटनाय् धर्म व राजनीति स्वाना खतरा जुइफूगुलिं स्थानीय प्रहरी प्रशासन चिन्तित खनेदु ।
सतक छायेपीकथं व बुद्ध जन्मस्थल लुम्बिनीया म्हसिकाया नितिं खुगु लेन सतकया दथुइ डिभाइडरय् योगिकुटी निसें मंगलापुरतक स्वसः मिटर दुरीया फरकय् नगरपालिकां २२गु बुद्धया मूर्तित तयातःगु खः । लुम्बिनी भ्रमण वर्षया लसताय् वंगु बैसाख १ गते प्रदेश ५ सरकारया उद्योग, पर्यटन, वन तथा वातावरण मन्त्री लीला गिरीं मुर्ति अनावरण यानादीगु खः । बुद्ध मूर्ति स्थापनाया नितिं नगरपालिकां ५० गु लख तका बजेट फ्याःगु खः ।
नेपाली कांग्रेस, तिलोत्तमा नगरपालिका, सत्तारुढ नेकपा तिलोत्तमा नगर कमिटी, राष्ट्रिय जनमुक्ति पार्टी, मगर संघनापंया दर्जन अप्व संघसंस्थां विज्ञप्ति पिकया औपचारिकरुपं निन्दा याना घटनाय् दुथ्यापिं सीका कारवाही यायेत माग तकं याःगु दु ।
थ्व दथुइ खुम्ह दुजःया मालेज्या पुचः तकं दयेकुगु दु ।इलाका प्रहरी ज्याकु बुटवलया मू प्रहरी नायब उपरीक्षक भिमलाई भट्टराईया नेतृत्वय् पुचः दयेकुगु खः ।
डीएसपी भट्टराईया कथं थुगु घटना विशुद्ध आपराधिक जूगु दाबी यानादिल । खुगु लेनया सतकय् सीसीटीभी मदया दोषी मालेत इ काइगु न्ह्यथनादिल ।
छें तयातःगु सीसीटीभी स्वबलय् चान्हसिया निता इलय् सतकय् छगु गाडी ब्वाँय् वंगु खनेदुसां मूर्ति तोडफोड जूगु खनेमदु ।
बुद्धमुर्ति तोडफोडयात नगरपालिकां थःगु लोकंह्वाःगु ज्यां आत्तेजुया विकासविरोधी तत्वं नियोजित व संगठितरुपं घटना याःगु क्वछ्यूगु दु । मूर्ति तोडफोडलिपा च्वंगु तिलोत्तमा नगर कार्यपालिकाया आकस्मिक मुँज्यां उगु घटनाया निन्दा व भर्त्सना याना राष्ट्रिय विभुति, शान्तिया अग्रदुत, महामानव गौतमबुद्धया मूर्तिइ जूगु तोडफोडं कानुनी राज्यया उपहास याःगु व सकल नगरबासीयात दुःखी दयेकुगु क्वछ्यूगु दु । थ्व घटनाजूसां कोटिहवातक थप बुद्धमूर्ति तयेगु नगरपालिकाया योजना महिलेगु व बुद्धमूर्तिया सुरक्षाया नितिं विशेष व्यवस्था नगरपालिकां यायेत्यंगु दु ।
छ्याता
फेसबुक छ्याता