न्येयेद्व तका नापं नेवाः अधिकारया नितिं नेवाः एकता आर्थिक अभियान न्ह्याःत


येंया लगं-ज्याबहा:याम्ह सुनिलकुमार शाक्यं न्येयेद्व तका तयाः नेवाः अधिकारया नितिं नेवाः एकता आर्थिक अभियान न्ह्याकादीगु दु । हाल जापानया टाेकियाेलय् च्वनादीम्ह शाक्यं थुगु अभियान नेवाः सँस्कृति व म्हसिका ल्यंकातयेत जुयाच्वंगु सँघर्षयात तिबः बीत न्ह्याकादीगु खः । गुथि विधेयक विरुद्ध फिब्व ख्यलय् नेवा:एकता व नेवाः शक्ति प्रदर्शनयात निरन्तरता बीत व नेवाः अधिकार सुनिश्चित याकेत नेवाः अधिकारया नितिं नेवाः एकता आर्थिक अभियान न्ह्याःकागु शाक्यं न्ह्थनादिल । एकता आन्दोलनया आज्जु पूमवंतले थुकिं निरन्तर काइगु अभियन्ता शाक्यया धापु दु ।


नेवा: कार्यकर्तायात आर्थिक रुपं सशक्त याना नेवा: एकतायात प्रबल याना छप्प छधि जुया न्ह्या वनेगु नितिं हे नेवा: एकता अभियान पलिस्था यायेमाःगु वयेकलं कनादिल ।

स्वदेश व विदेशय् च्वनादिइपिं परोपकारी समाजसेवा व दयालु मन दुपिं नेपामिपिं थ्व महत्वपूर्ण अभियानय् सलंग्न व सहभागि जुया: नेवा: अधिकार व एकताया नितिं योगदान व तिब: बीगु वयेकया विश्वास दु ।

थुकि मुंगु व खर्च जूगु फुक्क दांया ल्याःचाः सामाजिक संजाल फेसबुकपाखें पारदर्शिता यायेगु खँ कनादिसें नेवाः अधिकार व नेवाः एकताया नितिं जक उगु दां खर्च यायेगु वयेकलं न्ह्यथनादिल ।

थुगु आर्थिक अभियानय् आर्थिक कजिकथं नेपालय् कुमुद श्रेष्ठ च्वनादीगु दु । वय्कः नेपालभाषा मचा सिरपाःया संस्थापक दुजः नं खः ।

अथेहे, विदेशपाखें धासा शाक्य हे च्वनादीगु दु । ग्लाेबल नेपाः नेटवर्कया कजि शाक्यं थ्व न्ह्यः नेपालभाषा मचा सिरपा वितरण यानादीगु दुसा नेवाः सुपरस्टारया धाेषणा यानादीगु दु ।


Share on Google Plus

News: Newa News

    छ्याता
    फेसबुक छ्याता