फाेहाेर ल्ह्वनेगु न्यान्हुनिसें बन्द, कर्फ्यू तयासां वान्छ्वइगु


नुवाकोटया सिसडोलबासीं येंया फोहोर ज्वना वःगु गाडीयात पंगु दु । सिसडोलया ल्यान्डफिल्डसाइट प्रभावित लागाया स्थानीयबासी प्यन्हु न्यान्हुनिसें आन्दोलनय् दु । प्रभावित लागाया बासिन्दायात बियावयाच्वंगु क्षतिपूर्ति अप्वयेकेमाःगु, ल्यं दुगु अधिग्रहण यायेमाःगु नापंया माग तःगु दु ।

थुकिं येंया सतकय् मुनाच्वंगु फोहोर व्यवस्थापन थाकुगु दु । शनिबाः धासा प्रहरी परिचालन याना ६० गु गाडीया फोहोर वांछ्वःगु दु । थ्व झ्वलय् फोहोर ज्वना वःगु गाडीयात स्कर्टिङ याःगु प्रहरी व स्थानीयबासीदथुइ सामान्य झडप जूगु खः । छुं स्थानीय व प्रहरी घाःपा जूगु दु ।

यें महानगरपालिकाया वातावरण विभाग प्रमुख हरिकुमार श्रेष्ठं इलय् व्यलय् सहलहया नितिं सःतूसां स्थानीयबासी मवःगु न्ह्यथनादिल । थःपिं मागबारे सम्बोधन यायेगु प्रक्रिया न्ह्यःने यंकेत तयार जुयागु वयेकलं न्ह्यथनादिल । पंग थनेगु ज्या मद्यूसा प्रहरीया स्कर्टिङय् फोहोर वान्छ्वयेगु व उकिं नं मज्यूसा स्थानीय प्रशासननाप सहलह याना कर्फ्यु तयेगु वयेकःया धापु दु । महानगरपालिकां ककनी गाउँपालिकाका जनप्रतिनिधिनाप नं सहलह याःगु दु । फोहोर वांछ्वयेगुलि पंग मथनेगु व स्थानीयया माग प्रक्रियां हे सम्बोधन यायेगु सहमति जूगु दु । तर, स्थानिय थःगु माग सम्बाेधन मजूतले पंग थनेगु धयाच्वंगु दु । स्थानीयपाखें लिखित कथं छुं नं माग धासा मवःनि ।

 यें महानगरपालिकाया तथ्यांक कथं स्वनिगःया न्हिथं ८५३ टन व वार्षिक ३ लख ७० द्व ८० टन फाेहाेर उत्पादन जुइ । सिसडाेलय् छुं मनुयात समस्या जूल जुइ तर स्वनिगलय् ला महामारी जुइ, श्रेष्ठं न्ह्यथनादिल ।
Share on Google Plus

News: Newa News

    छ्याता
    फेसबुक छ्याता