नेपालभाषा चिहाः संकिपायात १६०० डलर


वंगु दँय् जुगु नेपालभाषा चिहाः संकिपा धेधेबल्लाया संकिपात क्यना अमेरिकां १६०० डलर अर्थात थ्यंमथ्यं छगु लख न्हयेन्हय् द्व तका ल्ह्वंगु दु । अमेरिकाया थीथी ८ गु थासय् क्यना थुगु ध्यबा मुंकुगु खः । आइतबार छगु मुँज्याया दथुइ  ग्वसाखलः व चिहाः संकिपाकमि पिनि दथुइ मुंगु दां लल्हाय्गु ज्या जुगु खः । धेधेबल्ला लिपा चिहा संकिपा थीथी थासय् क्यनेगु व क्यने धुंका आम्दानी ग्वसा खलः व संकिपाकमि दथुइ इनेगु सम्झौता कथं थुगु ज्या जूगु खः ।

अमेरिकाया थीथी थासय् च्वनाच्वंपिं नेवाःतय् थाय् वना थुगु संकिपा क्यनेज्या जुगु खः । हलय् क्यनेत थाकुगु व थ्व व्यक्तिगत कुतः जुगुलिं नेवाः तय् छें हे मनु मुंका धेधेबल्लाया गुंगु संकिपात क्यनेज्या जुगु ग्वसा परियोजनाकार अमेरिकाय् च्वनादिम्ह प्रविण ताम्राकारं न्ह्यथनादिल । ग्वसा खलकं पीगु प्रतिशत व संकिपाकमिपिंत ६० प्रतिशत आम्दानी इनेज्या जूगु खः ।

नेपालभाषाया ख्यलय् न्हूगु अभ्यास कथं थुगु संकिपा धेधेबल्ला जूगु निर्देशक रामकृष्ण खड्गी न्ह्यथनादिल । धेधेबल्लाखय् लियाँल्यू तकं जुयादिम्ह खड्गीं चिहाः संकिपाया सफलतां थःपिं उत्साहित जुयागु व थथेहे पुवंगु संकिपा त थुकथं हे अमेरिका व मेमेगु देसय् क्यनेगु लकस देकाबीत ग्वसाखलःयात इनाप तकं यानादिल ।

धेधेबल्लाखय् ल्यू लाःगु मिथ ० निर्देशक दर्शन शाक्यं थःपिंनिगु थुगु संकिपात थुकथं आम्दानी याःगु धैगु ब्लकबस्टर हिट धासां मपाइगु न्ह्यथनादिल ।

ग्वसाखलःया छम्ह दुजः संकिपाकमि नापं लोकंह्वाम्ह म्ये हालामी पवित्र कसां मेगु धेधेबल्लाया ई निला जक ल्यं दुगु व वर्कसप तकं यायेगु बिचा यानाच्वनागु न्ह्यथनादिल । ग्वसाखलःया मेपिं दुजःपिं नेपालभाषा टाइम्सया सम्पादक सुरेश किरण व भाषाह्यःमि सुमन श्रेष्ठं ब्वतिकापिंत सुभाय् देछानादिल ।

थुगुसि जुइगु चिहाः संकिपा धेधेबल्लाया नितिं प्रकाशित साहित्यया लिधंसाय् काय्मागु व २०गु मिनेत स्वयां ताहाक जुइमज्यूगु ग्वसाखलकं न्ह्यथंगु दुसा थुगु क्राइटेरिया तसकं अस्पष्ट जुगुलिं संकिपा देकेत यक्व हे थाकुइगु व चुनौति दइगु वंगु दँया चिहा संकिपा धेधेबल्लाखय् न्हाप लाःगु हासः मदुगु सःया निर्देशक सुनिता जुनुं न्ह्यथनादिल ।

ज्याझ्वलय् लियांल्यू लाम्ह भकुंग्वारा ख्याःया यादव भ्वछिध्वय्, स्वचेतना निर्देशक प्रज्वल शाक्य नापं पवन जोशी निर्देशित लिच्व कलाकारपिं अनु महर्जन व राम महर्जनया ब्वति दुगु खः ।

Share on Google Plus

News: Newa News

    छ्याता
    फेसबुक छ्याता

0 comments:

Post a Comment