क्लबयात सांसद श्रेष्ठं इन ११ लाख ७५ हजार (भिडियाे नापं)

जेष्ठ ६,ये‌ं । झिंछगु लख न्हेय् न्याद्व तका सांसद जीवनराम श्रेष्ठं लःल्हानादीगु दु । स्थानीय स्तरय् माःगु बिकास स्थानीय, प्रदेश व संघ सरकार नापं थःथःगु थासय् ग्वाहाली यायेमाःगु धासें सांसद श्रेष्ठं सुया गज्यागु क्षमता दु अज्यागु हे ग्वाहाली यायेमाःगु न्ह्यथनादिल । शुक्रबाः ये‌ं वडा नं. २३ य् दफ्टर क्लव छे‌ं जग स्व‌नेज्या जूगु दुसा उगु हे छें दनेत संसद बिकास कोष पाखे स्थानीय पूर्वाधार बिकास ज्याझ्वः दुने सांसद श्रेष्ठं ग्वाहाली यानादीगु खः । मूपाहाँ कथं झाम्ह थुगु हे क्षेत्र ८ पाखें त्याम्ह सांसद श्रेष्ठ व २३ वडाध्यक्ष मचाराजा महर्जनं मंकाकथं नित‌जाया छेंया जग स्वनादिगु खः।

अथेहे वडाध्यक्ष महर्जनं स्थानिय नाप याेजना बियादीत इनाप यानादिसें योजनात कार्यान्वयन यानायंकेगु न्ह्यथनादिल। मेगु दँया नितिं योजना मु‌ंकाच्वनागु वयेकलं न्हयथनादिल। यक्वसित लाभ जुइगु याेजनायात महानगर छ्वयेगु ज्या थम्ह यायेगु वडाध्यक्ष महर्जनं न्ह्यथनादिल ।

क्लब नायः राकेश शाहीं छें हानं देकेधुंका सामाजिक,स्वास्थ्य, भाषा ,कला व सांस्कृतिक ज्याझ्वः बुलुहुँ यानायंकेगु न्ह्यथनादिल । क्लबं सामाजिकपाखे जेष्ठ नागरिकया हितय् ज्या यायेगु योजनानापं न्ह्यःने वनाच्वंगु व सांस्कृतिकपाखे भाषा, कला, साहित्यया संरक्षण, जात्रा पर्व सञ्चालनय् ग्वाहालि यानावयाच्वंगु अध्यक्ष शाहीं न्ह्यथनादिल ।

ज्याझ्वलय् वडा दुजः चन्द्रा देबि मानन्धर, दफ्टर सामुदायिक क्लब भवन उपभोक्ता समितिया नायः सुरेन्द्र शाही, छ्याञ्जे सुभाष शाही नापं उपभोक्ता समिति, क्लबया पदाधिकारीपिं, जेष्ठ नागरिक तिर्थ देबि शाही व नेकपाया जिल्ला समिति व स्थानिय नेतापिं नापं स्थानीय जनसमुदायया ब्वःति दुगु खः ।