भव्य रुपं बुद्ध जयन्ती हनाच्वन


२५६३क्वगु बुद्ध जयन्ती, स्वाँया पुन्हि वा बुद्ध पुन्हि भगवान् द्यः गौतम बुद्धप्रति श्रद्धा प्रकटयाना न्यायेकाच्वंगु दु । गौतम बुद्धया जन्म, बुद्धत्व प्राप्ति व महापरिनिर्वाण प्राप्ति छन्हु हे लाःगु वैशाख शुक्ल पूर्णिमा जूगुलिं बौद्ध धर्मावलम्बीतय्सं त्रिसंयोग दिवस कथं न्यायेकाच्वंगु दु ।

इशापूर्व ५६३ अर्थात् थौं स्वयां २५६३ दँ न्ह्यः सिद्धार्थ गौतमया जन्म माँ मायादेवी थःछें देवदह वनेगु झ्वलय् लुम्बिनीइ जूगु खः । जुजु शुद्धोधन व मायादेवीया सुपुत्र सिद्धार्थ गौतम २९ दँया बैशय् दरबार त्वताः ज्ञान मालेत पिहाँवंगु खः ।

खुदँया तपस्यालिपा ३५ दँया बैशय् इशापूर्व ५२८ स भारतया बोधगयाय् वैशाख शुक्ल पुन्हिया दिनय् सिद्धार्थ गौतमयात बुद्धत्व प्राप्ति जुया बुद्ध जूगु खः ।

३६ दँया बैशय् सारनाथय् गौतम बुद्धं न्हापांगु खुसिइ न्याम्ह शिष्ययात प्रवचन ब्यूगु खः । बुद्धत्व प्राप्तिलिपा आर्य अष्टाङ्गिक मार्ग व पञ्चशीलया उपदेश बियादीगु खः ।

आर्य अष्टाङ्गिक मार्गय् सम्यक दृष्टि, सम्यक सङ्कल्प, सम्यक वचन, सम्यक कर्म, सम्यक जीविका, सम्यक व्यायाम, सम्यक स्मृति व सम्यक समाधि लाः ।

बुद्धं ब्यूगु उपदेश कथं संसार दुःख हे दुःखं व्याप्त, दुःखया कारण दु, दुःखया अन्त्य न दु व दुःखया अन्त्यया उपाय वा लँपु नं दु । जन्म, व्याधि, जरा व मृत्युया प्यंगु सत्ययात बुद्धं व्याख्या याःगु दु । अथेहे, पञ्चशील धैगु खुयाः मकायेगु, मखु खँ मल्हायेगु, व्यभिचार मयायेगु, मद्यपान मयायेगु व हिंसा मयायेगु खः । मानव समुदायया लागि मदयेकं मगाःगु उपदेश ब्यूगुलिं हे बुद्धयात एसियाया नगु धयातःगु दु ।

लुम्बिनीइ ज्याझ्वः



स्वाँया पुन्हिया त्रिसंयोगया लसताय् हलिंन्यंकं थीथी ज्याझ्वः जुयाच्वंगु दु । नेपालय्  बुद्धजन्मस्थल लुम्बिनी, बुद्धया क्रिडास्थल शुद्धोधनया दरबार लागा दुगु तिलौराकोट व कपिलवस्तु लागा, बुद्धया अस्ति धातु दुगु रामग्राम, पाजुया थाय् देवदह नापंया लागा नापं बौद्ध गुम्बा, विहारय् भव्य रुपं बुद्धजयन्ती न्यायेकाच्वंगु दु ।

बुद्ध जन्मस्थल लुम्बिनीइ थ्व दथुइ विशेष ज्याझ्वः ग्वसाःग्वगु दु । राष्ट्रपति विद्यादेवी भण्डारीया मूपाहाँसुइ लुम्बिनीया सभाहलय् जुइगु ज्याझ्वलय् प्रधानमन्त्री केपी शर्मा ओली, प्रदेश ५ या मुख्यमन्त्री शंकर पोखरेल, संघीय सरकारया मन्त्रीपिं, प्रदेश सरकारया मन्त्रीपिं, बौद्धधर्मगुरुपिं, नापंया ब्वति दु ।

थुगुसिया बुद्धजयन्ती मूल समारोह प्रदेश ५ सरकार व लुम्बिनी विकास कोषं मंका कथं व्यवस्थापन याःगु दु । थौं सुथ प्रधानमन्त्री ओलीं भिक्षुतयेत संघ दान यानादीगु दु ।

थौं हे लुम्बिनीइ निद्व खुसः व पीस्वंमा सिमा पिना ज्याझ्वःया सुरुवात प्रधानमन्त्री यानादीत्यंगु दु । 
Share on Google Plus

News: Newa News

    छ्याता
    फेसबुक छ्याता

0 comments:

Post a Comment