हा मंतकि मनुत नं दइ मखु । थ्व छिं स्यूला ? हा मन्तकि संसार हे अस्तव्यस्त जुइ । स्वाँ ह्वइ मखु, वा सइमखु, जाकि दइ मखु । पौराणिक बाखँ कथं बुंगद्यःयात नेपालय् हःगु इलय् बुंगद्यः नं भम्बःया रुप काःगु व नेपालय् वा दुने जाकि सःगु कथन दु । थौं कन्हे बुंगद्यःया जात्रा तकं जुयाच्वंगु दु ।
थ्व फुक्क खँ पिहांवःगु कारण थौं हलिं हा दिवस जूगुलिं । राष्ट्रसंघं मे २० यात दय्दसं अन्तराष्ट्रिय हा दिवस कथं न्यायेका वयाच्वंगु दु । थुगु दँ हलिं हा दिवसया नारा ‘हलिंन्यंकं हा म्वाकेगु’ धका तयातःगु दु । हा म्वाकेगु अभियानया अभियन्तातय्सं थौं ‘हा म्वाकेगु, संसार म्वाकेनु’ नारा नापं न्यायेकाच्वंगु दु । न्ह्यथने बहजू नेपालय् थ्व दिवस सरकारी तवरं न्यायेकी मखु ।
नेपालय् मुक्कं निगु लख हा छेँ दुगु अनुमान दु । छगु छेँय् ३० निसें ४० द्व हा दइ । नेपालय् स्थानीय जातया सेरना हा व विकासे जातया मेलिफेरा हा छेँ लहीगु जात खःसा पाखा हा व कठ्यौरी जातया हा जंगलय् दइ । नेपालय् मुक्कं १ लख २० द्व सेरेना व ५० द्वया ल्याखय् मेलिफेरा हा दयाच्वंगु दु । पाखा हाया ल्याः १० निसें १२ द्वया अनुमानित तथ्याङक दु ।
अथेहे, नेपालय् देन्यंकं दँय् १६ स टन जक कस्ति उत्पादन जुइ । नेपाःया माग कथं आःया उत्पादन ५० प्रतिशत नं मगाःनि । स्वद्व टनस्वयां अप्व कस्तिया माग दुसा नेपालय् ल्यं दुगु विदेशं आयात यानाच्वंगु दु । विदेशय् नेपाली कस्तिया तसकं माग दःसां अनौपचारिक कथं जक विदेश निर्यात जुयाच्वंगु दु । नेपालय् नीछद्व कस्ति किसानत दु । हा बचाउ अभियन्तातय्सं कस्ति उत्पादन जक मजूसे लकस म्हालासालाया नितिं तकं हा संरक्षणय् राज्य जिम्मेवार जुइमा ।
हाःया महत्व
लकस ह्यूपाया हुनिं हलिंन्यंक हे हा या ल्याः म्हो जुयाच्वंगु दु । आःया अनुपातय् हा नास जुयावनिगु खःसा कस्ति जक मखु फुक्क नसाय् संकट ब्वलनि, लकस नं ध्वस्त जुइगु अनुसन्धानकर्तातयेगु धापू दु । थुकिइ इलय् हे बिचाः मयायेगु खःसा लकस स्यना नय् मखना वनीगुलिं मनु जाति तकं सिधया वनी ।
यदि पृथ्वीं हा लोप जुलकि प्यदँ दुने हे मनुया अस्तित्व मदयावनिगु प्रसिद्ध वैज्ञानिक अल्वर्ट आइन्स्टाइनं तकं धयातःगु दु । ब्ल्याक होलया बारे धयातःगु खँ हालसालय् तिनि प्रमाणित जूगु दु । हा या खँ नं पक्का नं पाय्छि जुइ तर थ्व खँ जुइ कि मजुइ स्वेका धका पिया च्वने मजिउ । पृथ्वीइ दुगु ९० प्रतिशत बोटविरुवा हा या परागसेचनं म्वानाच्वंगु दु । परागसेचन मन्तकि स्वाँमाया अस्तित्व तनावनी । थुकिं नसा नय् मखना वनी, प्राकृतिक विपत्तिया कारण मानव जातिया तकं अस्तित्व तनावनी ।
आःया स्थितिइ झी थ्व विषयलय् गम्भीर मजुयानी । लकस ह्यूपा व विषादीया तच्वःगु छ्यलाबुलां खतराय् लाःगु हा म्वाके फुसा जक लकस थप उथलपुथल मजुइके फइ । अमेरिकाय् जक स्वय्गु खःसा हाया ल्याः ४० निसें ५० गु प्रतिशत तने धुंकल । युरोपय् हा या ल्या क्वाहा वनाच्वंगु दु । हलिंन्यंक २० द्व प्रजातिया हा दु । उकि छगु लख न्ह्येय् द्व प्रजातिया स्वांमायात परागसेचन याइ ।
0 Comments:
Post a Comment