'लमि' स्वनिगलय् वल


नेवाः संकिपाया इतिहासय् पोखरां न्हापांगु खुसिइ दय्कुगु संकिपा 'लमि' । नेवाः संकिपात उलि बजारय् खने मदयाच्वंगु इलय् न्हूगु सवाः ज्वना वःगु दु। पारिवारिक कचवं नापं ब्याहा यायेबहम्ह म्याय्यात लमिं धाः वय्धुंका छु जुइ ? ब्याहा धुंका थम्हं धाःथेंयाम्ह भात मन्त धासा मिसाया छु भावना जुइ ? कथा बस्तुं गुकथं हिलावनी ? थ्व फुक्क सीकेया नितिं यक्व मनुत आतुर जुयाच्वंगु दु। संकिया त्रेलर पिहाँवय् साथ सामाजिक सञ्जाल क्वाकुगु थुगु संकिपा धाथें गथे च्वं फुक्कस्यां पियाच्वंगु दु। न्हूपिं कलाकारत कया निर्माण जूगु थुगु संकिपातय् पोखरा व सुर्खेतया वस्तीया दृश्यत कयातःगु दु। विक्रम उदास, जितेन्द्र नापित, अञ्जली महर्जन, नापंया मू भुमिका दु।

पोखराया न्हापांगु नेवाः संकिपा थ्व हे लमि नेवाः संकिपा राष्ट्रिय दबूया ग्वसालय् वैगु जेठ ११ गते शनिबाः ११ः४५ ता इलय् सिटिम्याक्स हल, बागबजारय् क्यनेत्यंगु दु। पाेखराया कलाकार व प्राविधिकतय्सं दय्कूगु थुगु संकिपाया निर्देशक यादव दास भोछिभ्वय जुयादीगु खः । नेवाः संकिपाया बजार ब्यबस्थापनय् नेवाः संकिपात पोखराय् तकं क्यनेज्या जुयाच्वंगु दु। थ्व इलय् पोखराया थुगु संकिपा स्वनिगलय् क्यनेज्या नं न्ह्याकुगु दु। शनिवाःपतिकं छगू शो लमि क्यनेज्या याय् त्यंगु दबुया नायः रत्नकाजी महर्जनं न्ह्यथनादिल ।

पोखराय् न्हापांगुखुशीइ थुगु नेवाः संकिपा लमि दय्कूगु खःसा
स्वनिगः नाप नापंया थासय् थुकियात हौसला दइगु संकिपा निर्देशक यादव दास भोछिभ्वयया विश्वास दु।


Share on Google Plus

News: Newa News

    छ्याता
    फेसबुक छ्याता