ख्वपय् गुन्हु तक तान्त्रिक विधिकथं न्यायेकिगु बिस्केट जात्रा थौं निसें न्ह्याय् त्यंगु दु । सनिलय् तौमढी दरबार परिसरय् देकातःगु भैरवनाथ व भद्रकालीया खः सालाः जात्रा न्ह्याइ । जात्राया नितिं सल्लाघारी जंगलं गोल्लागु सिमा चाना ५५ ल्हाःया यःसिं देकेमाः ।
यसिं थनेगु नं जात्राया मू आकर्षण खः । जात्राया न्हापांगु दिं खतय् खड्ग, तरबार व निशान तयाः विशेष पूजाआजा व स्थानीयया ब्यागलं पूजाआजा धुंका खः सालाः जात्रा न्ह्याकि ।
सिं, नं व जस्ता छ्यलातःगु प्यागोडा शैलीया स्वतंजाःगु भैरवनाथया खः व सिं व नंया भद्रकालीया नितंजाःगु खः भैरवनाथ व न्यातपौ देगः न्ह्यः देकेधुंका पूजाआजालिपा तान्त्रिक विधिकथं हे तौमढीया क्वने व थःनेया त्वालय् सालाः धेधेबल्ला याइ ।
थ्व दथुइ प्रशासनं जात्राया इलय् ख्वपय् एय्ला न्याय्मी पंगु दु । प्रहरीं जात्राय् संयमता ब्वलंकेत व सभ्यताया म्हसिका बीत इनाप तकं याःगु दु । जात्राय् ल्वापु ख्यापु व दुर्घटनाया मू कारण एय्ला जुगु क्वछ्यूसें जात्रा सन्चालन लागाय् एय्ला न्याय्मी निषेध यानागु महानगरीय प्रहरी परिसर ख्वपया प्रमुख प्रहरी उपरीक्षक हिमालयकुमार श्रेष्ठं न्ह्यथनादिल । जात्रा ज्वःछि ख्वपय् द्वछि अप्व प्रहरी परिचालन जुइत्यंगु दु । महानगरीय प्रहरी परिसर ख्वपया प्रमुख श्रेष्ठया कथं १४गु थासय् नेपाल प्रहरीया तधंगु गस्ती दइ । जात्राया लागि थप स्वसः जनशक्ति माग याना गुसः व पीछम्ह नेपाल प्रहरी परिचालन याय्गु न्ह्यथनादिल । मुक्कं निसः सशस्त्र प्रहरीतकं जात्राय् खतेयाय्त्यंगु दु । माःकथं सेना परिचालनतकं जुइगु वय्कलं न्ह्यथनादिल । नगरया ४३गु थासय् सिसी क्यामेरा तयातःगु दु । जात्रायात बिचाः याना ब्यागलं सुरक्षा रणनीति कथं सादा वसतय् तकं प्रहरी परिचालन जुइत्यंगु दु । जात्राय् खः सालेगु झ्वलय् थःने व क्वने दथुइ ल्वापु जुइगु, अप्पां कय्केगु व भागदौड जुइगु सम्भावना न्ह्यथसें प्रशासनं सचेत जुइत इनाप याःगु दु ।
0 Comments:
Post a Comment