सक्वय् बज्रयोगिनीया मू जात्रा जुयाच्वन


सक्वय् च्यान्हु तक जुइगु बज्रयोगिनी मू जात्रा आः जुयाच्वंगु दु । थुगु जात्रा वंगु बैशाख ६ गते न्ह्याःगु खः । जात्रा न्ह्याःगु प्यन्हुया दिं थौं मूजात्राया रुपय् बज्रयोगिनीया मुर्तिनापं स्वयम्भू चैत्यः, सिंहिणी, ब्याघ्रिनी व अमोघसिद्धिया मूर्तियात नं  खटय् तया बाजं नापं साँखु चाहिकिगु परम्परा दु । थ्व जात्राया झ्वलय् बज्रयोगिनी देगलं बज्रयोगिनीया लुँ सियातगु प्रतिमूर्ति, सिंहिनी, व्याघ्रिनी व स्वयम्भू चैत्य यानाः प्यगुं मूर्ति निगु किलोमीटर क्वय् च्वंगु साँखु बजारय् यंका नगर परिक्रमा याइ । थ्व नापं न्हापा बसुन्धरा माजुयात तकं जात्रा याना परिक्रमा याकि । स्थानिय पवन लाल श्रेष्ठया कथं न्हापा थुगु जात्राय् बसुन्धरा माजुयात जक नगर परिक्रमा याकीगु खः ।  बज्रयोजिनीयात उग्रतारा कथं बौद्धमार्गीतय्सं कयाच्वंगु दुसा हिन्दुमार्गीतय्सं गुकियात दुर्गाया रुप कथं कयाच्वंगु दु ।

जात्राया लागि च्यान्हू न्ह्यः न्याम्ह थाकुली व गुर्जु नापं स्थानीय नगरबासीया पाखे ध्यबा व ग्वय् तयाः स्वयम्भू चैत्य व मूल बज्रयोगिनी देवीयात ब्वनेमागु परम्परा दु । व नापं येंया बसन्तपुरय् तकं ब्वनेमागु परम्परा दु । न्हापा येंया लिपाम्ह मल्ल जुजु जयप्रकाश मल्लया पालय् तक जुजु थः हे उपस्थित जुया जात्रा याय्मागुलि लिपा जुजुं थःगु तरवार जक छ्वया हःगुलिं आः नं जुजुया तरवार साक्षी तया जक जात्रा याय्गु परम्परा ल्यनाच्वंगु दु ।

स्वद्व व स्वसः दँ न्ह्यः साँखु महानगर स्थापनाया लसताय् जुजु शङ्खरदेवं थुगु जात्रा न्ह्याकुगु किंवदंति दु । न्ह्यय्गाः जात्रा कथं प्रसिद्ध थुगु जात्रा आः धासा साँखुइ जक ल्यनाच्वंगु श्रेष्ठं न्ह्यथनादिल । जात्राया झ्वलय् याय्माःगु यक्व खँ त बुलुहुँ तनावनाच्वंगु वय्कलं न्ह्यथनादिल । गुठि संस्थान, शंकरापुर नगरपालिका नापं स्थानियवासिया आर्थिक ग्वाहालिं जात्रा न्ह्यानाच्वंगु तर ग्वाहालि अझ नं अपुग जुगु न्ह्यथनादिगु दु । तामाङ्ग समुदायया तकं न्यायेकेमाःगु थुगु जात्राया बारे अझ अप्व अनुशन्धान व अध्ययन जुइमाःगु आवश्यकता अझ नं ल्यनाच्वंगु दु ।


Share on Google Plus

News: Newa News

    छ्याता
    फेसबुक छ्याता