उदाय् समाजया उदाय् सः एफएम ज्याझ्वः सच्छि ब्वः हना ज्याझ्वः


 सुगत रत्न सिन्दुराकार                                                                                                                                 
उदाय् समाजं रेडियो उपत्यका ८७.६ मेगाहर्ज एफएमय् न्ह्योब्वया वयाच्वंगु उदाय् सः एफएम ज्याझ्वः सच्छि ब्वः थ्यनेत्यंगु लसताय् उदाय् सः सच्छि ब्वः हना ज्याझ्वः माघ १ गते ध्यःचाकु सन्हुया न्हि असंया उदाय् छेँय् न्हिनय् हंगु दु । समाजया नायो डा.रुपज्योति कसाःजुया सभापतित्वय् न्ह्याःगु खः । थुगु ज्याझ्वलय् समाजया नायो डा. रुपज्योति कसाः, मूछ्यान्जे स्वयम्भू रत्न तु्लाधर, डा.ज्ञानेन्द्र रत्न तुलाधर, सुगत रत्न सिन्दुराकार, उत्तमराज शिलाकार, विगेन तुलाधर, पञ्चवीरसिंह तुलाधर, परशु घिमिरे, प्रेमहिरा तुलाधरपिन्सं थःथःगु नुगः खँ तयादीगु खः । उगु सच्छि ब्वः हनेगु ज्याझ्वलय् उदाय् सलय् अन्तरवार्ता बियादीपिं उदाय् ब्वत्तित्वपिं लगायतपिन्त ब्वनेगु याःगु खः । 

 रेडियो उपत्यकापाखें परिकल्पना यानाः उदाय् समाजं न्ह्योब्वया वयाच्वंगु उदाय् सः ज्याझ्वः थौं लोकप्रिय ज्याझ्वःया रुपय् नेवाः समाजय् स्थापित जुयावयाच्वंगु दु । उदाय् समाजया म्हसीका गुकथं खः व उदाय्तसें थःगु सरोकारया ज्याखँत गुकथं न्ह्याकावयाच्वंगु दु धैगु सार्वजनिक याय्गुकथं न्ह्याना वयाच्वंगु थुगु ज्याझ्वः २०७५ साल माघ २ गते बुधवाः तकया दुने १०० गू इपिसोड थ्यंगु दु । थुगु १०० गू इपिसोड तकया दुने करीव ९० सिवें अप्पो उदाय् व्यतित्वपिंके अन्तरवार्ता कयाः प्रसारण याय्धुंकूगु दुसा करीव ९० सिवें हे आप्पो उदाय्तय्गु बारे क्वातुक च्वयातःगु म्हसीका नं प्रसारण जुइधुंकूगु दु । अथेहे उदाय्तय्गु गुंगू थरं थीथी इलय् न्ह्याका वयाच्वंगु थःगु खलः पुचःया गतिविधि बुखँया रुपय् आपालं उदाय् सः मार्फत प्रसारण नं जुइधुंकूगु दु । 

उदाय् सःया छगू महत्वपूर्ण पक्ष धैगु हे राष्ट्रया निंतिं थीथी कोणं योगदान बियाच्वंगु उदाय् व्यक्तित्वपिं नाप खँल्हाबल्हा नं खः । थुगु खँल्हाबल्हां नं उदाय्तसें समाजय् गुकथंया योगदान बिया वयाच्वन धैगु सीकेत आधार चुलानाच्वंगु दुसा प्रेरणा काय्गु आधार नं होता चुलाना वयाच्वंगु दु । राष्ट्रया निंतिं क्वातुक योगदान प्रत्यक्ष अप्रत्यक्ष रुपं यानाच्वंपिंपाखें हे प्रेरणा कयाः न्हूपुस्तापिन्सं छुं कथंया सोच ब्वलंकेगु नं ज्या यानाच्वनी । नापनापं प्रेरणां हे थःम्ह नं गुकथंया ज्याय् पलाः न्ह्याकावंसा बांलाइ धैगु विचार सिर्जना याना न्ह्यने वनाच्वनी । उकिं उदाय् सः ज्याझ्वलय् न्ह्यानावयाच्वंगु उदाय् व्यक्तित्वपिनिगु अन्तर्वार्ता छगू नं महत्वं जाःगु ज्याया रुपय् समाजय् स्थापित जुया वयाच्वंगु दु । थुगु उदाय सः ज्याझवःस हरेक वाःया बुधवाः सुथसिया  ८ः३० ताः निसें ९ः३० ताः तक न्ह्यानावयाच्वंगु दु । थौंकन्हय् थुगु एफएम त्रिपुरेश्वरया वल्ड ट्रेड सेन्टरया भवन प्रशारण जुयावयाच्वंगु दु । संचारकःमि भाजु विगेन तुलाधरं न्ह्याकावयाच्वंगु थुगु उदाय् सः एफएम २०७३ साल फागुन ११ गते बुधवाःनिसें न्ह्याःगु खः । 

थुगु ज्याझ्वःया व्यवस्थापन पक्षयात सुथां लाकेया नितिं उदाय् समाजं छगू एफ एयम उप समिति नं गठन याय्गु ज्या जूगु खः । उदाय् समाजया मूदुजः डा. ज्ञानेन्द्र रत्न तुलाधरया संयोजकत्वय् नीस्वंगु थुगु समितिइ दुजःया रुपय् सुगत रत्न सिन्दुराकार, उत्तमराज शिलाकार, प्रेमहिरा तुलाधर व विगेन तुलाधर दुथ्यानाच्वंगु दु ।  उदाय् सः एफएम ज्याझवः सर्वसाधारणं इलय् व्यलय् न्यने फय्मा धकाः थौं कन्हय् युवट्युवय् नं तय्गु ज्या जुयाच्वंगु दु । 
Share on Google Plus

News: Tuladhar Bigen

    छ्याता
    फेसबुक छ्याता

0 comments:

Post a Comment