न्हूदँ समारोह व र्याली स्थगित


नेपाल संवत न्हूदँ राष्ट्रिय समारोह समितिया मुँज्यां न्हूदँ नेपाल संवत ११३९या भिंतुना र्याली मयायेगु क्वछ्यूगु दु । ने.सं. ११३९ कछलाथ्व पारु थुगुसी कार्तिक २२ गते लाःगु दुसा न्हूदँ नेपाल संवत आन्दोलनया प्रणेता नापं नेवाः न्ह्यलुवाः, बरिष्ठ मानवअधिकारवादी नेता, आदिवासी जनजातिया न्ह्यलुवाः पद्मरत्न तुलाधर मदुगुलिं समवेदना कथं न्हूदँ मन्यायेकेगु निर्णय याःगु खः ।

समारोह समितिया नायः सत्यभामा माथेमाया सभापतित्वय् जूगु मुँज्या याःगु खः ।

प्रेस विज्ञप्तिइ थुकथं न्ह्यथनातःगु दु :

नेपाल संवत् आन्दोलनया प्रणेता लिसें आदिवासी जनजाति आन्दोलन व मानव अधिकार आन्दोलनया न्ह्यलुवा भाजु पद्मरत्न तुलाधर मत्यवं मदुगु कारणं शोक स्वरुप नेपाल संवत् ११३९ न्हूदँया लसताय् जुइगु सम्पूर्ण ज्याझ्वः स्थगित जूगु दु ।

थौं ने.सं. ११३८ कौलागा १४ (कात्तिक २० गते) मंगलवाः कुन्हु च्वंगु नेपाल संवत् न्हूदँ राष्ट्रिय समारोह समितिया मुँज्यां उगु निर्णय याःगु खः ।

दँय्दसं थें थुगुसी नं नेपाल संवत् ११३९ न्हूदँया लसताय् थ्वहे वइगु ने.सं. ११३९ कछलाथ्व पारु (कात्तिक २२ गते) कुन्हु येँया बसन्तपुली न्हूदँया मू समारोह यायेगु ज्याझ्वः क्वःजीधुंकूगु खः । मदुम्ह भाजु तुलाधर प्रति सम्मान देछाये कथं वकुन्हुया ज्याझ्वः स्थगित याःगु खः ।

वकुन्हु हे ग्वसाः ग्वइगु मेमेगु थाय्या ज्याझ्वः नं स्थगित याःगु दु ।

स्थगित जूगु ज्याझ्वःत मदुम्ह भाजु तुलाधरया झिंस्वन्हुया पूण्यतिथि लिपा मेगु अनुकुल न्हि कुन्हु ग्वसाः ग्वयेगु निर्णय नं बैठकं याःगु दु ।

Share on Google Plus

News: Newa News

    छ्याता
    फेसबुक छ्याता