२०७५ ज्येष्ठ २५ शुक्रबार
यल / दय्दसं कार्तिकय् यल मंगलबजारया कार्तिक दबुलिइ जक क्यनिगु कार्तिक नाच येँ क्यनेत्यंगु दु । थ्व हे असार ३ गते राष्ट्रिय नाचघरय् ग्वसा ग्वय् त्यंगु ‘स्वजन रघुवंशी याकः सनिल’ य् न्हापांगु खुसि कार्तिक नाच नापं पंचकपाल चर्या मंचय् न्ह्यब्वय््त्यंगु दु । कलाकार स्वजन रघुवंशीं न्हापांगु खुसि थुगु प्रस्तुतित मंचय् न्ह्यब्वयेत्यंगु खः ।
लोपोन्मुख नृत्यतयेगु संरक्षण व अन्तर्राष्ट्रिय लागाय् थुकिया म्हसिका बीगु आज्जु नापं ज्याझ्वः ग्वसाग्वयेत्यंगु खः । कलाकार स्वजन रघुवंशीया एकल प्रस्तुती दइगु ज्याझ्वलय् ३८० दँ पुलांगु परम्परागत कार्तिक नाच, चर्या प्याखँ नापं झ्याउरे, भरतनाट्यम, कत्थक, साल्सा नापंया प्रस्तुति कलाकार स्वजन रघुवंशीं न्ह्यब्वयेत्यंगु दु ।
निघौतक जुइगु ज्याझ्वलय् लाइभ वाद्यवादननापं प्रस्तुती न्ह्यब्वयेत्यंगु दु । नृत्य निर्देशक संघ नेपाल, यल शाखाया नायः तकं जुयादिम्ह रघुवंशीं थम्हं थुगु ज्याझ्वःया नितिं यक्व हे मेहेनत यानाच्वनागु न्ह्यथनादिल ।
नृत्य निर्देशक संघ, नेपालया केन्द्रीय नायः भुवनदास श्रेष्ठं कलाकार देःया तिसा मखुसे राज्यको न्यागूगु अंग कथं परिभाषित यायेत माग यानादिल । अथेहे न्वकु संजय शर्मा राजोपाध्यायं नेपालय् न्हापांगु खुसि नृत्य विधाय् एकल साँझ जुइत्यंगु दावी यानादिल ।
कत्थक नृत्यय् जुनियर डिप्लोमा नापं सिनियर डिप्लोमाय् स्वर्ण पदक त्याम्ह कलाकार रघुवंशी, श्रृजना कलेज अफ फाइन आर्टय् ब्याचलर अफ फाइन आर्टय् उत्कृष्ट जुयादिम्ह खः । देशय् विदेशय् थीथी ज्याझ्वलय् थःगु प्रस्तुति नापं नृत्य सम्वन्धि थीथी कार्यशालाय् श्रोत व्यक्ति कथं आवद्ध जुयादिगु दु । अग्रज कलाकारपिनिगु सम्मान नापं नव कलाकार पिनिगु नितिं डबलीया विकास यायेत संघ क्रियाशील जुगु वयेकया धापु दु ।
ज्याझ्वः वैगु असार ३ गते जमलया सांस्कृतिक संस्थान, राष्ट्रिय नाचघरय् ग्वसाः ग्वय् त्यंगु दुसा नृत्य निर्देशक संघ नेपाल, यल शाखा व सांस्कृतिक संस्थान ग्वसालय् जुइत्यंगु खः ।
0 Comments:
Post a Comment