मरुसतः पुनःनिर्माण समिति विषयगत उपसमिति गठन

मरुसतः पुनःनिर्माण समितिं बैशाख २७, २८ व २९ गते मरुसतःया भग्नावशेष कथं दुगु पुलांगु सिंया संरक्षणया नितिं दरबार लागाया थीथी थासय् पँचिनातःगु ऐतिहासिक सिंया संकलन याय्त्यंगु दु । प्रदेश नं ३या सांसद राजेश शाक्यया अध्यक्षताय् दयेकुगु समितिइ न्वकु तेज रत्न ताम्राकार, छ्याञ्जे गौतम डंगोल, दांभरि अशोकरत्न बज्राचार्य व ल्यू छ्याञ्जे विभोर लाल श्रेष्ठ नापं थीथी उपसमिति गठन जुगु दु ।

विषयगत उपसमिति कथं ज्याकू व्यवस्थापन, निर्माण, प्राविधिक, सुचना तथा सञ्चार, अर्थ संकलन, खरिद व्यवस्थापन, जन सहभागिता परिचालन, लोजिस्टिक, डकुमेन्टेसन, इमेजिङ्ग, अनुसन्धान, कानुनी परामर्श व कला याना १३ गु उपसमिति गठन जुगु दु ।

२०७२ सालया तःभुखाचं पाःता जुगु मरुसतः दयेकेत अधिकार सम्पन्न थुगु समिति निस्वंगु खः । येँ महानगरपालिका मेयर विद्यासुन्दर शाक्यया अध्यक्षताय् निर्देशक समिति निस्वना वडा १९, २०, २३ व २४या अध्यक्षपिं शशिलाल श्रेष्ठ, राजेन्द्र मानन्धर, मचाराजा महर्जन, बालकृष्ण श्रेष्ठ, राष्ट्रिय पुननिर्माण प्राधिकरण व पुरातत्व विभागया प्रतिनिधि दुजः कथं च्वंगु दुसा काष्ठमण्डप पुननिर्माण समिति नायः शाक्य सदस्य सचिव कथं च्वनादिगु दु । थुगु निर्देशक समितिया निर्देशनय् काष्ठमण्डप पुननिर्माण समितिं ज्या यायेत्यंगु खः । अथेहे निति निर्माण व सुपरिवेक्षणया नितिं संरक्षक पुच, विज्ञ पुच व सल्लाहकार पुच नं गठन यायेत्यंगु दु ।

मरुसतः जनस्तरं हे देकेमागु सः पिज्वयाच्वंगु इलय् थुकथं महानगरपालिकाया मेयर विद्यासुन्दर शाक्यं पहल याना स्थानिय जनप्रतिनिधि व स्थानियवासिन्दा यात कःघाना समिति निस्वनादिगु खः ।

Share on Google Plus

News: Anonymous