येँया राष्ट्रिय नाचघरय् ‘नृत्य गुरुआमा हनी श्रेष्ठ सम्मान साँझ २०७४ तथा सांस्कृतिक कार्यक्रम’ थौं बिहिबाः जुइत्यंगु दु । नृत्य निर्देशक संघ नेपालपाखें नृत्य निर्देशक हनी श्रेष्ठयात सम्मान याइगु जूगु दु ।नृत्य विधाय् पद्मकन्या बहुमुखी क्याम्पसय् निगू दशक स्वयां अप्वः अध्यापन याकादीम्ह श्रेष्ठ थौंकन्हय् श्रृजना कलेज अफ आर्टपाखें स्नातक तगिंया शिक्षा बिया वयाच्वनादीगु दुसा थीथी संघसंस्थाय् आबद्ध जुयाः मदिक्क नृत्य प्रशिक्षण बियाः निरन्तरकथं थुगु क्षेत्रय् सक्रिय जुयाः ज्वःमदुगु योगदान दु ।
वय्कःयात दोसल्लां न्यय्काः नीन्याद्वः न्यासः व न्यय्तकालिसें सिजःपौ व डि–डान पदकपाखें हनीगु नं ग्वसाः खलकं जानकारी बियादीगु दु ।
सम्मान ज्याझ्वलय् नृत्य निर्देशक संघ नेपालया येँ, यल, ख्वप, काभ्रे, चितवनलिसेंया थीथी शाखा व कलालिसे सम्बद्ध संघसंस्थाया ग्वाहालिइ सांस्कृतिक ज्याझ्वः नं न्ह्यब्वइगु जूगु दु ।
थ्व हे झ्वलय् नृत्य निर्देशक संघ नेपाल पलिस्था जूगु दिं श्रावण २६ गतेयात “राष्ट्रिय नृत्य दिवस” घोषणा याय्त नं सरकारलिसे माग याःगु दु ।
0 Comments:
Post a Comment