विश्व सम्पदा पदमार्ग सरसफाइ क्वचाल


सम्पदा व सँस्कृति संरक्षण याय्गु अभियानकथं विश्व सम्पदा पदमार्ग सरसफाइ अभियान थौं तःजिक क्वचाल । विश्व सम्पदा क्षेत्र हनुमानध्वाखानिसें मेगु विश्व सम्पदा क्षेत्र स्वयम्भूतकया पदमार्ग सरसफाइ थौं येँ महानगरपालिका मेयर विद्यासुन्दर शाक्यया संयोजनय् सांसद जीवनराम श्रेष्ठया उपस्थीतिइ क्वचाल । विश्व सम्पदा उत्सवया लसताय् जूगु सरसफाइ अभियान येँया मरुत्वालय् मेयर शाक्यं बँ पुया न्ह्याकादीगु खः । मरु गणेद्यःथासं सुरु जुगु सरसफाइ अभियान मरु हिति, सन्तानेश्वर महाद्यः लागा, मरुबहि, बञ्जाहिति, चसान, दमाइ टोल, सुन्तागल्ली, पाछै गल्ली, न्यत, ताम्सिपाखा जुया भुरुङ्गख्यः थ्यंका बिसर्जन जूगु खः । भुरुङ्गख्यःनिसें स्वयम्भू लागातक मेगु पुचलं सरसफाइ याःगु खः । येँ महानगरपालिकाया संयोजनय् सरसफाइ ज्याझ्वः जूगु खः । उगु ज्याझ्वलय् वडा नं. १८ या न्हूच्छे काजी महर्जन, वडा नं १९ या शशीलाल श्रेष्ठ, वडा नं २३ या मचाराजा महर्जनपिनिगु उपस्थिति दुगु खःसा हनुमानढोका दरबारक्षेत्र संरक्षण कार्यक्रमया प्रमुख उदय् बहादुर पसखल नापं मूल समारोह समितिया छयाञ्जे दिल्ली रत्न तुलाधर, दाँभरि विन्देश्वर श्रेष्ठ, दुजःपिं बालकृष्ण महर्जन, विजय श्रेष्ठ, अञ्जली मास्के, सुष्मा राजभण्डारी उपस्थिति दुगु खः ।

उगु सरसफाइ ज्याझ्वलय् झायादीपिं सकसित वडा नं. १८ या न्हुच्छे काजी महर्जनं धन्यवाद वियादीगु खः । सुथसिया ८ बजे सुरु जूगु ज्याझ्वः ९ बजे क्वचागु खः ।
विश्व सम्पदापदमार्ग निर्धारण नापं व्यवस्थित याय्त निस्वंगु विश्व सम्पदा उत्सव मूल समारोह समितिया ग्वसालय् जुयाच्वंगु थुगु अभियानकथं थौं सरसफाई क्वचागु खःसा वैशाख ३ गते फोटो वाक, ४ गते कासा दिवस, ५ गते ब्वनामि हेरिटेज वाक, ६ गते हुलाक टिकट प्रदर्शनी, ७ गते आर्ट वर्कशप व ८ गते हेरिटेज वाकनापं मू ज्याझ्वः जुइत्यंगु दु । उगु ८ गते हेरितेज वाकया उलेज्या हनुमानध्वाखाय् सँस्कृति, पर्यटन तथा नागरिक उद्दयन मन्त्रीपाखें जुइगु व स्वयम्भूइ मुल कार्यक्रम प्रधानमन्त्री केपी शर्मा ओलीया मू पाहाँसुइ जुइत्यंगु समितिया छ्याञ्जे डिल्ली रत्न तुलाधरं न्ह्यथनादिल ।

थुकथं हे १५ वडाया वडाअध्यक्ष इश्वरमान डंगोलया सक्रियताय् पदमार्ग सरसफाइ अभियान १५ वडाया इलाकाय् नं क्वचागु दु । थुगु ज्याझ्वलय् वडा सदस्य मचालक्ष्मी महर्जन, समाजसेवी राजा शाक्य व सञ्जय ध्याकोया उपस्थित जूगु खः । रेञ्जर रेजिमेन्टया अन्र्तगत दुगु डब्लु डब्लु वाइया सिसडोल फोहर व्यवस्थापन समुहपाखें उगु सरसफाइ ज्याझ्वःयात ग्वहालि विउगु खः ।

Share on Google Plus

News: Tuladhar Bigen

    छ्याता
    फेसबुक छ्याता