उदाय् टेबिलटेनिस क्वचाल


बनिया ल्यायम्ह पुचःया ग्वसालय् न्हापांगु उदाय् टेबिल टेनिस कासा फागुन २६ गते शनिवाः व २७ गते आइतवाः न्ह्याना क्वचागु दु । उदाय् समाजया नायो डा.रुपज्योति कसाःजुपाखें त्वाःदेवाः च्याकाः उलेज्या जुया लौनचौरया कवर्ड हलय्  उगु ज्याझ्वः जूगु खः । निन्हु तक न्ह्याःगु थुगु कासाय् त्याःपिन्त उदाय् समाजया नायो डा. रुपज्योति कसालं शिल्ड लःल्हानादीगु खः । थुकथं हे बनिया खलःया नायो अमृतमानसिंह बनियां त्याःपिन्त मेडल क्वखायकादीगु खःसा पुचःया दांभरिं प्रसन्न बनियां प्रमाण पत्र लःल्हानादीगु खः । पुचःया सेक्रेटरी रुची बनियां न्ह्याकूगु समापन मुँज्याय् कासाया कोअर्डिनेटर अञ्जन बनियां कासाय् तिवः बियादीपिन्त मतिनाया चिं लःल्हानादीगु खः । कासाया उलेज्याझ्वलय् बनिया खलःया नायो अमृतमान सिंह बनिया, डा.रुपज्योति कसाःपिन्सं थःथःगु नुगः खँ तयादीगु खः ।

 उगु  धेंधेंबल्ला कासाय् डा.रुपज्योति कसाः व कलाकार सलिन मान बनियापिन्सं कासा म्हिता कासा न्ह्याकेगु नं याःगु खः । नापं थुगु कासाय् ११ दँ निसें ७० दँ तकया कासामिपिन्सं ब्वति काःगु खः । थुगु कासाय् थ्यंमथ्यं १२० म्ह कासामिपिन्सं ब्वति काःगु खः । थुगु कासाया निर्णायक मण्डलय् काठमाडौं जिल्ला टेविलटेनिल संघया नायो धर्म बज्राचार्य व न्वकु धर्म शाहीपिं जुयादीगु दु । थुगु कासाय् ब्वति काःपिन्सं थःगु खेल उत्साहजनक रुपं न्ह्योब्वगु नं खः । उदाय्तय् दथुइ जुइगु थुगु कासा उदाय्त टेविल टेनिस कासाया ख्यलय् गुलि च्वन्ह्याः धकाः नं क्यंगु दु ।   प्यंगू समूहलय् विभाजित जुया न्ह्याःगु थुगु कासाय् उदाय्तय्गु थीथी थरया कासामिपिन्सं सक्रियरुपं ब्वति काःगु खः ।
थुकथं हे उगु रोचक कासाय् अन्डर १५ दँया जुनियरय् न्हाप सोभित स्थापित, ल्यू अजुव सागर कंसाकार व लियांल्यू प्रमित तुलाधर लाःगु खः । थुकथं हे ओमेन सिंगलय् न्हाप निक्की बनिया, ल्यू मुन्का तुलाधर, व लियांल्यू  बिन्दु बनिया लाःगु खः ।ः ओमन डबलय् निक्की तुलाधर बनिया व विन्दु राजवंशी वनिया लाःगु दुसा ल्यू सजना स्थापित व अनिसा तुलाधर लाःगु दु । अथेहे लियांल्यू अनु कंसाकार व सुचिता कंसाकार लाःगु दु ।

     थुकथं हे उगु कासाय् मेन सिंगलय् न्हाप अरिश ताम्राकार, ल्यू सुुनिल काजी ताम्राकार व लियांल्यू ओजेस स्थापित लाःगु दु । अथेहे मेन डबलय् न्हाप सुनिल काजी स्थापित व सुमन स्थापित लाःगु दु । ल्यू प्रसन्न बनिया व अन्जन बनिया लाःगु दुसा लियांल्यू राहुल रत्न तुलाधर व शोभित स्थापित लाःगु दु । थुकथं हे कासाय् ४० दँ स्वयां च्वय्या भेटेरान्सय् न्हाप बिजय रत्न ताम्राकार, ल्यू राजेशमान सिंह तुलाधर व लियांल्यू अमूल्य दास तुलाधर लाःगु दु ।
     

Share on Google Plus

News: Tuladhar Bigen

    छ्याता
    फेसबुक छ्याता