होलिया बिशेष ज्यझ्व: होलिया मेला भव्य तरिकां क्वचाल


होली नखः वंगु बिहिबाः फागुन १७ गते स्वनिगः नापं पहाडी लागाय् क्वचाल सा थौं जनकपुर नापं तराइलय् होली न्यायेकाच्वंगु दु । वंगु बिहिबाः हे होली नखःया लसताय् होली म्हितेगु नापं पिकनिक न्यायेकेगु ज्याझ्वःत तकं जुल । उगु हे दिन छगु पिकनिक जुल येंया क्वय्ना गणेद्यः थाय् । चोभाःया क्वय्ना गणेद्यःया मेगु नां जल विनायक खः ।


गोर्जियस इन्स्टिट्यूट अफ फेसन टेक्नोलाजी (गीफ्ट) या ग्वसालय् व क्लबमाण्डु इन्टरटेन्मेन्टया ग्वाहाली जुगु थुगु ज्याझ्वःयात होलीया मेला नामांकरण यानातःगु खः । थुगु ज्याझ्वलय् थुगुसिया मिस नेवाः पोखरायात लसकुस याःगु खःसा लोकंह्वाःपिं कलाकारपाखें म्ये हाला होलीया हसना कालबिल याःगु खः ।


आत्मिय तवरं क्वचाःगु होली नखः व होलीया मेला ज्याझ्वलय् पवित्र कसाः, सानुबाबु महर्जन, सुरज व्यञ्जनकार, गंगा महर्जन व किशोर कुमारं थःपिनिगु साँगितिक प्रस्तुतिं होली म्हितेत मूपिं भाजु मय्जुपिंत प्याखँ ल्हुइत बाध्य याःगु खः । ज्याझ्वलय् मिस नेवाः पोखरा ११३८या ग्वसा खलःया पदाधिकारीपिंत लसकुस याय्गु नापं मतिनाया चिं देछाय्गु ज्याझ्वः जुगु खःसा मिस नेवाः पोखराया ब्वतिकामि मय्जुपिंसं थःथःगु म्हसिका बियादिगु खः ।

थवंथवय् होली म्हितेगु व डिजेया धुनय् प्याखँ हुले सिधय्का न्ह्याःगु लसकुस व मतिनाया चिं लल्हाय्गु ज्याझ्वलय् रवि महर्जनं सकल पाहाँपिंत लसकुस यानादिगु खःसा मिस नेवाः पोखरा ११३८या भ्रमण जानकारी रत्नकाजी महर्जनं बियादिगु खः । उगु होलीया ज्याझ्वलय् नेवाः टेलिभिजन वय्त्यंगु जानकारी नेवाः मिडिया नेटवर्कया नायः नापं नेवाः टिभि एचडिया प्रबन्ध निर्देशक नविन जोशी बियादिल । उकथं हे धुँ दे प्रोडक्सनया नायः नापं निर्माता रामकृष्ण महर्जन धिनां नं वइगु फागुन २६ गते न्हुगु सकिंपा बसन्त ऋतुया च्यारिति शो जुइगु नं जानकारी बियादिल ।

होली ज्याझ्वः सिधय्का नेवाः भ्वय्या ग्वसा तकं ग्वगु खः । मिस नेवाः पोखरापिंत परम्परागत रुपं गुकथं भ्वय् नकि धका दसु बी कथं थुगु भ्वय्या ग्वसा ग्वयागु सुभाय् देछानादिम्ह गीफ्टया निर्देशक शोभा महर्जनं न्ह्यथनादिल । पोखराया प्रतिनिधिपिन्सं  ज्याझ्व: यागु  लसताय महर्जनयात मतिनाया चिं देछागु ख: ।


ज्याझ्वःयात रेडियो उपत्यका व नेवाः अनलाइन न्यूजया फेसबुक पेजं प्रत्यक्ष प्रशारण याःगु खः । ज्याझ्वःयात तिकिझ्याः वाःपौ, लहना वाःपौ, नेवाः न्यूज डटकम व सुभाय् पोष्टपाखें सञ्चार ग्वाहाली याःगु खःसा नोभा मिल्कं विशेष ग्वाहाली याःगु खः ।
ज्याझ्वः क्लबमाण्डुपाखें प्रज्वल शाक्यं न्ह्याकादिगु खः ।

किपा :

















Share on Google Plus

News: Newa News

    छ्याता
    फेसबुक छ्याता