न्हापांगु येँ महानगरव्यापी मेयर्स ट्रफि चिग्वः धिमे धेंधेंबल्लाः थौं पोहेंलागाः द्वादशी (पुस २९ गते) शनिवाःया दिं जुइत्यंगु दु ।
किलाघः साँस्कृतिक पुचया ग्वसालय् जुइगु थुगु धेंधेंबल्लाखय् येँ महानगर दुनेया ३२ वडाया ६३ ज्यापु त्वाः खलः मध्ये मुक्कं २० गू खलःपुचलं ब्वति काय्त्यंगु दु । नां दुतिनेगु निंतिं वंगु पोहेंलाथ्व द्वादशी (पुस १५) तक ई बियातःगु खः ।
धेंधेंबल्लाखय् न्हाप, लिउ व लियांलिउ लाःगु पुचःयात नगद सिरपाः, ट्रफी, मेडललिसें दसिपौ लःल्हाय् त्यंगु दु । न्हाप लाःम्हेसित छगु लख, ल्यूयात न्यय्द्व व लियाँल्यू लाम्हसित नीन्याद्व लःल्हाइगु पुचःया छ्याञ्जे रत्नकाजी महर्जनं न्ह्यथनादिल ।
निर्णायक मण्डल अध्यक्ष कथं वरिष्ठ वाद्यवादक न्हुछे बहादुर डंगोल, वाद्यगुरु पंचनारायण महर्जन, युवा वाद्यगुरु नरेश प्रजापति व मिसा निर्णायक सुनिता महर्जनं च्वनादिगु दु।
नेपालभाषा व संस्कृतिया संरक्षण, संवद्र्धन, उत्थान व ल्याय्म्हतय्त सांस्कृतिक व सामाजिक क्षेत्रय् क्रियाशील याकेगु नापं पुचःया ग्वसालय् येँ महानगर दुने च्वंपिं ल्याय्म्हतय्गु प्रतिभा न्ह्यब्वय्गु व नेवाःलिसें हलिमय् लोकंह्वाःगु धिमे बाजं च्वन्ह्याकेगु आज्जु कयागु पुचःया नायः सानु महर्जनं न्ह्यथनादिल । थुगु ज्याझ्वलं चिग्वः धिमे बाजंया संरक्षण व प्रवद्र्धन जुइगु विश्वास महर्जनं काःगु दु ।
धेंधेंबल्लाःलिसें नेवाः ल्याय्म्हतय्गु प्रतिभा न्ह्यब्वय्कथं थीथी सांस्कृतिक न्ह्यब्वया नापं नेवाः नसात्वँसाया स्टल तया सांस्कृतिक महोत्सव कथं जुइगु धेधेबल्लाया कजि तेजरत्न महर्जनं न्ह्यथनादिल ।
थुगु ज्याझ्वः येँ महानगरपालिका, नबिल फाउण्डेशनलिसें थीथी व्यक्ति व संस्थाया आर्थिक ग्वाहालिइ जुइत्यंगु न्ह्यथंगु दु । तिकिझ्याः वाःपौ, रेडियो उपत्यका 87.6, काष्ठमण्डप टेलिभिजन, तिकिझ्याः न्यूज डटकम व नेवाः न्यूज डटकम अफिसियल मिडियाकथं च्वनाच्वंगु दु ।
0 Comments:
Post a Comment