येंया झिगु निर्वाचन लागाय् स्वंगु बाहेक फुक्क लागाय् वाम गठबन्धनया बर्चस्व


मंसिर २२ गते, बहनीसिया ११ः३० जुल । येंया आःतकया निर्वाचन मतगणनाया लिच्व स्वय्गु खःसा झिगु निर्वाचन लागाय् स्वंगु बाहेक फुक्क लागाय् वाम गठबन्धनया बर्चस्व खनेदत । निर्वाचन क्षेत्र नं १ य् नेपाली काँग्रेसया प्रकाशमान सिंहया ९२८९ मत कुतुवंगु दुसा वय्कःयात विवेकशील साझाया रविन्द्र मिश्रं लिनाच्वंगु दु । मिश्रया ८३५२ मत दु । उकथं हे काँग्रसया गगन थापां क्षेत्र ४ पाखें खः थें मखुथें न्हाप लाकाच्वंगु दु । थापाया १११२५ मत दुसा नेकपा एमालेया राजन भट्टराईया ११०५२ मत दु । थापा ७३ मतं न्ह्यःने दु । अथेहे काँग्रेसया राजन केसीं माओवादी केन्द्रया हितमान शाक्ययात २१८१ मतं ल्यू लाकाच्वंगु दु । केसीया ११९७९ मत दुसा शाक्यया ९७९८ मत दु । 

थ्व बाहेक फुक्क थासय् बहुमत हयाच्वंगु बाम गठबन्धनया क्षेत्र नं ६ माओवादी केन्द्रया झक्कु सुवेदीं रक्षा मन्त्री भिमसेनदास प्रधानयात ३३५ मतं हाथ्य बियाच्वंगु दु । २२६५ मत नापं सुवेदी न्हाप लाःगु दुसा रक्षा मन्त्री प्रधान १९६० मत नापं थःत रक्षा याय्त ब्वाँय् वनाच्वंगु दु ।

क्षेत्र २, ३, ५, ७, ८ व ९ एमालेया पकड बल्लानाच्वंगु दु । २ नम्बरय् पुलाम्हं प्रधानमन्त्री माधवकुमार नेपालया चक्कंगु अग्रता दु । वय्कःया ७४५७ मत दुसा वय्कया निकततम प्रतिद्वन्धि नेकांया दीपक कुइकेलया ३९४९ मत जक दु । ३ नम्बरय् एमालेया कृष्ण राईया ९४०४ मत दुसा नेकांया अम्बिका बस्नेतया ७६३० मत दु । नं ५य् एमालेया इश्वर पोखरेल नाप नेकांया प्रकाशशरण महत बच्छि मतं बुनाच्वंगु दु । पोखरेलया ३०४९ मत दुगु इलय् महतया १५४९ मत जक दु । ७ नंबरय् नं अन्तर तब्या यानाच्वंगु एमालेया रामबीर मानन्धरया ५०२५ मत दुसा २२७३ मतं ल्यूने लानाच्वम्ह राप्रपाया विव्रmमबहादुर थापाया २७५२ मत जक दु । बांलागु प्रतिस्पर्धा जुयाच्वंगु क्षेत्र ८ य् एमालें अन्तर अप्वय्का च्वंगु दु । ६८१ मत जक अन्तर दुगु खःसा एमालेया जीवनराम श्रृष्ठया १०३८१ मत दुसा वय्कःया प्रतिद्वन्धि नेकांया नविन्द्रराज जोशीया ९७०० मत कुतुवंगु दु । उकथं हे क्षेत्र नं ९ या मत अन्तर नं बुलुहु तब्या जुयाच्वंगु दु । ३६३१ मतान्तर दुगु थुगु लागाय् नेकांया ध्यानगोविन्द रंजितयात न्हापांगु खुसिइ चुनौति बीत एमालेया कृष्णगोपाल श्रेष्ठ ताःलागु दु । श्रेष्ठया १०६०८ मत दुसा रंजितया ६९७७ मत दु ।

लिच्व स्वय्बलय् जनतां एमालेयात थुगुसि ह्वःता ब्यूगु थें खनेदु । थ्व प्रारम्भिक नतिजा जुगुलिं ह्यूपा नं वय्फु । थुगु निर्वाचनं गज्यागु लिच्व वइ व इलं हे धाइ ।

Share on Google Plus

News: Newa News

    छ्याता
    फेसबुक छ्याता

0 comments:

Post a Comment