राजोपाध्याय समाजय् अमरराजया नेतृत्व

राजोपाध्याय समाजया निक्वःगु अधिवेशनं अमरराज शर्मा राजोपाध्याययात न्हूम्ह नायः कथं ल्यःगु दु ।
थौं यलय् क्वचाःगु समाजया निक्वःगु अधिवेशनलिसें प्यक्वःगु साधारण सभां नांजाःम्ह संगीतकःमि तकं खःम्ह अमरराजया नेतृत्वय् १३म्ह दुजःया न्हूगु ज्यासना पुचः सर्वसम्मतिं ल्यःगु खः ।


न्हूगु ज्यासना पुचलय् कलाकार संजय शर्मा राजोपाध्याययात न्वकू ल्यःगु दुसा संचारकःमि बिराजकाजी राजोपाध्याययात मू छ्यान्जे ल्यःगु दु । छ्यान्जेय् रचना शर्मा राजोपाध्याय च्वनादीगु ज्यासना पुचलय् जयन्ती शर्मा राजोपाध्याय दांभरिं व उद्धव आचार्य राजोपाध्याय ल्यू दांभरिं च्वनादीगु दु । दुजलय् नगेन्द्र राजोपाध्याय, विनोद ज्वालानन्द राजोपाध्याय, चेतना शर्मा राजोपाध्याय, वन्दना राजोपाध्याय, विजय शर्मा राजोपाध्याय, पिपुल सुवेदी राजोपाध्याय व विरु सुवेदी राजोपाध्याययात ल्यःगु दु ।
न्हूम्ह नायः कथं ल्ययेधुंकाः थःगु नुगःखँ तसें अमरराज राजोपाध्यायं थीथी कथंया अफवाह व भ्रम न्यंकाः पंगः थनेत स्वःसां समाज आःतक्क क्रियाशिल दुगु व आः अझ सशक्त रुपं न्ह्याःवनेगु धयादिल । समाजयात सक्षम, सबल दयेका वनेगु लँय् सकसिगु सल्लाह सुझाव कथं न्ह्याःवनेगु राजोपाध्यायया धापू खः ।


व स्वयां न्ह्यः ज्याझ्वःया उद्घाटन सत्रय् राजोपाध्याय समाज दुनेया दक्कले ज्याथःम्ह ९८दँया चुन्द्रचरण राजोपाध्याय (पान बाज्या) लिसें संस्कार व संस्कृति विज्ञ पण्डित रत्नराज राजोपाध्याययात विशेष सम्मानपाखें हंगु खः । सम्मानितद्वययात यल क्षेत्र नम्बर २ पाखें प्रतिनिधि सभाया सभासद कृष्णलाल महर्जनं हनापौ लःल्हानादिल सा समाजया नायः वदन ज्वालानन्द राजोपाध्यायं दोसल्लां न्ययेकादिल । उकिया लिसें २०७३ सालया एसइइ परीक्षाय् ताःलाःपिं समाज दुनेया विद्यार्थीपिन्त नं हंगु खः । दक्कले आपाः ल्याः हःम्ह छात्र सिवेश शर्मा राजोपाध्याय व छात्रा सुभिया राजोपाध्याययात तका सिरपाःलिसें हे हंगु खः । सकल विद्यार्थीयात सभासद महर्जनं हनापौ लःल्हानादिल । दक्कले आपाः ल्याः हःपिं विद्यार्थीपिन्त समाजया नायः राजोपाध्यायं तका सिरपाः लःल्हानादिल ।

नुुगः खँ तसें प्रतिनिधि सभा सभासद महर्जनं स्थानीय भाषा, संस्कृतिया उत्थानया लागिं थम्हं फक्व ग्वाहालि यायेगु प्रतिवद्धता प्वंकादिल । सांस्कृतिक पहिचानया ल्यंकातसें राजनैतीक अधिकार प्राप्तिया लँय् नं न्ह्याःवनेमाःगु महर्जनया छ्याता खः । ज्याझ्वलय् ताम्रकार समाजया नायः रविन्द्रराज ताम्रकार, वैदिक प्रतिष्ठानया नायः उपेन्द्रभक्त सुवेदी, पर्व समय सुधार राष्ट्रिय समाज नेपालया नायः महेश्वर जुजु राजोपाध्यायं राजोपाध्याय समुदाययात सांस्कृतिक, सांस्कारीक ख्यःया लिसें मेमेगु ख्यलय् नं बल्लाका यंकेत समाजं भूमिका म्हितेमाःगु धाःगु खः ।

Share on Google Plus

News: Tuladhar Bigen

    छ्याता
    फेसबुक छ्याता

0 comments:

Post a Comment