च्याक्वःगु नेवाः एकता दिवस तःजिक हन


सकल नेवाः जाय् नु, नेवाः एकता क्वातुके नु धैगु नारा नापं च्याक्वःगु नेवाः एकता दिवस तःजिक हन । नेवाः स्वायत्त राज्य मंका संघर्ष समितिया पहलय् दय् दसँ जुयाच्वंगु थुगु दिवस थुगुसि नेवाः देय् दबुलिं संयोजन याःगु खः ।


येँया भूगोलपार्कय् मुना पिकाःगु र्यालि असनय् थ्यंका सभाय् परिनत जुगु खः । सभाय् थुगुसिया ग्वसाः खलःया नायः नरेश ताम्राकार सभा नायः जुयादिगु खःसा मूपाहाँ कथं रक्षामन्त्री भीमसेनदास प्रधान झायादिगु खः ।
मूपाहाँ प्रधानं असं नेवाः तय्गु पहिचान च्वनाच्वंगु थाय् जुगुलिं नेवाः पहिचान ल्यंकेत नं अनाधिकृत कथं दय्कातःगु छें थुनाः सरकारया लगानिइ नेवाः पहिचान वइ कथं थःम्हं कुतः याय्गु कनादिल । वय्कलं थःगु बः भाषिक आन्दोलन स्वयां नं नेवाः तय्त राजनितिक अधिकार बीमागुलि दुगु न्ह्यथनादिल । वय्कलं प्रदेश ३ या नामाकरण नेपालमण्डल जुइमाःगु न्ह्यथनादिल ।


विशेष पाहाँ कथं एमाले सांसद जीवनराम श्रेष्ठ झायादिगु खः । सभाय् पाहाँ कथं नेवाः न्ह्यलुवाः तिर्थराम डंगोल, नेपाः राष्ट्रिय पार्टिया नायः विजय सैंजु, नेकपा माओवादी केन्द्र नेवाः मुक्ति मोर्चाया नायः दिलीप महर्जन, संघीय समाजवादी फोरम नेपालया कृष्णबहादुर घःजु, जनगायक भृगुराम श्रेष्ठ, ज्यापु महागुथि नेपाःया नायः लोककवि राजभाई जकःमि नापंया व्यक्तित्वपिं झाःगु खः ।

ज्याझ्वलय् नेपाःया राष्ट्रिय गान नापं नेवाः स्वायत्त राज्य म्ये व देय् दबुया नेवा मंका म्ये हाय्कुगु खःसा ज्यापु समाज यलया नायः प्रेम महर्जनं लसकुस व नेवाः जागरण मञ्चया नायः सुजीव बज्राचार्यं सुभाय् देछानादिगु खः । देय् दबूया मूछ्याञ्जे माईलाबाबु द्यःलां सभा न्ह्याकादीगु खः ।


नेसं ११३० पोहेलाथ्व नवमी कुन्हु नेवाः राष्ट्रिय सम्मेलन याना नेवाः दुने थजाः क्वजाःया अन्त जूगु घोषणा नापं नेवाः स्वायत्त राज्य घोषणा याःगु लुमन्तिइ नेवाः एकता दिवस हनाः वयाच्वंगु दु ।

किपा : बिगेन तुलाधर 
Share on Google Plus

News: Anonymous

    छ्याता
    फेसबुक छ्याता

0 Comments:

Post a Comment