नेवाः मिडिया प्रालिं टिस्टुङ्गय् बाजं हलंज्वलं हस्तान्तरण यात


नेवाः मिडिया प्रा.लिया न्हापांगु वार्षिकोत्सवया लसताय् परम्परागत बाजं हलंज्वलं हस्तान्तरण ज्याझ्वः टिस्टुङ्गय् जुगु दु । नेवाः मिडिया प्रालिया ग्वसालय् व टिष्टुङ्ग बज्रबाराही नेवाः पुचः व रामलाल श्रेष्ठ स्मृति प्रतिष्ठानया सहग्वसा कथं टिष्टुङ्गय् छगु ज्याझ्वया दथुइ बाजं इनेज्या जुगु दु  ।


नेवाः मिडिया प्रालिया नायः सन्त कुमार महर्जनया सभानायःसुइ न्ह्याःगु ज्याझ्वलय् पुर्व राज्यमन्त्री तीर्थराम डंगोल मूपाहाँ कथं झायादिगु खः । ज्याझ्वलय् पाहाँ कथं थाहा नगरपालिका प्रमुख लवशेर विष्ट, उपप्रमुख खड्ग बहादुर गोपाली, थाहा नगरपालिका वडा नं १ या वडाध्यक्ष हेरामान गोपाली, वडा नं २ या वडाध्यक्ष शशीधर सुवेदी, रामलाल श्रष्ठ स्मृति प्रतिष्ठानया संरक्षक जयराम लामिछाने, अध्यक्ष विनोद महर्जन, धामी मधुराम महर्जन, आचाजु सानुभाइ कर्माचार्य, गुरु बाबुलाल श्रेष्ठ, बाजं दाता कालु महर्जन व नेवाः मिडिया क्लबया नायः नविन जोशी, टिष्टुङ्ग बज्रबाराही नेवाः पुचःया नायः हरिगापाल श्रेष्ठ झायादिगु खः ।


अथेहे टिष्टुङ्ग बज्रबाराही नेवाः पुचःया नव निर्वाचित पदाधिकारी व नेवाः मिडिया क्लबया दुजः पिंत लसकुसयागु खः । ज्याझ्वलय् नेवाः मिडिया क्लबया नायः सन्त कुमार महर्जनं नेवाः मिडिया प्रालिया म्हसिका व उकिया पिथना तिकिझ्याः वाःपौया बारे कनादिल ।










थाहा नगरपालिका दुनेया परम्परागत बाजं खलःत तेष्टुङ्ग बाजं खल, द्योला बाजं खलः, कोठननी बाजं खलः, कुन्छाल बाजं खलः, कपाली समाज, बौद्ध गुम्बा, लिलाखेल बाजं खल, चित्लाङ्ग बाजं खलः, पालुङ्ग बाजं खलः कुलगाउँ बाजं खलयात खिं, धाः ताः, झ्याली, झ्याम्ता, म्वाः बाजं हस्तान्तरण याःगु खः ।


ज्याझ्वलय् ऐतिहासिक १२ दँया बौ थनेगु जात्राया झ्वलय् नेवाः पत्रकारतय्त टिष्टुङय् ब्वनेत ग्वाहालि यानादिपिंत हनापौ देछागु खः । ज्याझ्वः रामलाल श्रेष्ठ स्मृति प्रतिष्ठानया छ्याञ्जे प्रमोद जोशीं न्ह्याकादिगु खः ।


मूज्याझ्वः क्वचाय्का टिष्टुङ्ग, पालुङ्ग व चित्लाङ्ग भ्रमण याःगु दुसा टिष्टुङया पर्यटन प्रवर्द्धन विषयक सहलह ज्याझ्वः नापं त:गु दु । थ्व नापं सास्कृतिक ज्याझ्वः नं जुइगु ग्वसा: खलकं न्ह्यथंगु दु ।






Share on Google Plus

News: Newa News

    छ्याता
    फेसबुक छ्याता

0 comments:

Post a Comment