कला जीवनया अभिन्न अंग खःसा कलाकार राष्ट्रया तिसा खः । अन्तराष्ट्रिय स्तरया कलाकारत नं झिगु हे त्वाः, गाँ पाखें हे जन्म जुईगु खः । थुगु धापूयात थुईका म्हसिका एजुकेशन एण्ड इन्टरटेन्मेन्टया ग्वसालय् थ्वहे वईगु २०७४ असोज ५ गते बिहिवाः नःलास्वने खुन्हु म्हसिका इन्टर स्कुल डान्स कम्पीटिसन २०७४ जुईत्यंगु दु ।
यलया डि.ए.भी स्कुलया बुद्ध हलय् जुइगु उगु धेँधेँबल्ला कासाय् फाइनलया नितिं मुक्कं झिगु स्कुल थ्यंगु ग्वसा खलकं जानकारी बिउगु दु । एम्स एकेडेमी, ब्राईट फ्युचर, डिलाईट, ऐडेन गार्देन, ग्रेस एकेडेमी, क्षितिज, नेपाल डन बस्को, न्यु सुम्नीमा, श्री भोटाङ देवी व विद्या सदन स्कुलया विद्यार्थी पिन्सं थःगु प्रतिभा न्ह्यब्वयेत्यंगु दु।
म्हसिका एजुकेशन एण्ड इन्टरटेन्मेन्टपाखें शिक्षा मुलक व मनोरञ्जनात्मक ज्याझ्वःत यक्वः न्ह्यवः निसें याना वयाच्वंगु दु । अथेहे थीथी ज्याझ्वः यायेगु झ्वलय् थीथी ब्वनेकुथीइ व्वनिपिं ब्वनामीपिन्त नं हःपा बिईमाःगु ताय्का थूगु ज्याझ्वः यायेत्यनागु ज्याझ्वःया संयोजक सागर महर्जनं कनादिल । थूगु ज्याझ्वलय् थीथी व्वनेकुथीया ब्वनामिपिन्सं नेपाः दुने दूगु थीथी साँस्कृतिक नापं लोक हुला प्याखँ क्यनिगु ग्वसा दु ।
थूगु ज्याझ्वलय् न्हाप लाःगु पुचःयात स्वुई द्वः तका पुरस्कार तया तःगु दुसा, ल्युलाःगु पुचःयात नीद्वः अथेहे लियाँल्यु लाःगु पुचःयात झिद्वःतकाया पुरस्कार व्यवस्था याना तःगु दु ।
आपा: धैथें जुईगु स्कुल स्तरिय धेँधेँबल्लाखय् अभिभावक पिन्सं स्वेमखनिगुयात ध्याने तसें म्हसिका एजुकेशन एण्ड इन्टरटेन्मेन्ट पाखें जुईत्यंगु थूगु धेँ धेँ बल्लाय् सच्छीया टिकट कया ज्याझ्वः स्वये दईगु व्यवस्था याना तःगु दू ।
0 Comments:
Post a Comment