आः नेवाः हे प्रधानमन्त्री जुइगु !









येँ, तिकिझ्याः/जिलाजं जक मन्त्री जूगु स्वयाः लय् ताइपिं नेवाःतय् निंतिं छगू लसताया सुचं वःगु दु । आः देय्या प्रधानमन्त्री नेवाः हे जुइत्यंगु दु ।

तिकिझ्याः वाःपौयात फोनपाखें वःगु जानकारीकथं शेरबहादुर देउवाया गुलाया कार्यकाल क्वचाय्वं नेवाःयात हे प्रधानमन्त्री दय्केगु धइगु सहमति स्वंगुलिं दलया दथुइ जुइधुंकूगु दु । कलाःपिसं थः दाजुकिजायात नं प्रधानमन्त्री दय्केमाल धकाः घुर्की क्यंगु हुनिं हे थथे नेवाः प्रधानमन्त्री दय्केत स्वंगुलिं दलया नेतात तयार जूगु धाःगु दु ।

भागबण्डां न्ह्यानाच्वंगु नेपाःया राजनीतिइ ब्रम्र्हूतय्सं जक प्रधानमन्त्री नल धइगु नेवाःतय्गु सःयात लिसः बीत नं थथे याय्गु क्वःज्यूगु धाःगु दु । तर नेवाः प्रधानमन्त्री गुगु दलं दय्केगु धइगु सहमति धाःसा जूगु मदुनि । पद धाल कि तिंन्हुइपिं नेवाः न्ह्यलुवापिं धाःसा प्रधानमन्त्री जुइगु निंतिं तिंतिं न्हुयाः चाकडी यानाजूगु व पद दइगु खःसा न्हापा थःपिसं म्ह्याय् व सम्पत्ति बियागु खँयात ल्वःमंकाः आः मेगु न्ह्याथेंजाःगु सेवा याय्त नं तयार जुइगु धाःगु दु ।

नेवाः प्रधानमन्त्री जुइगु धइगु खँ फोनपाखें जानकारी वय्वं तिकिझ्याः वाःपतिं नेवाः न्ह्यलुवापिंत सम्पर्क यानाः आः सुयात प्रधानमन्त्री दय्कूसा पाय्छि जुइ धकाः सर्वे यानागु खः ।

सर्वेया लिच्वः धाःसा म्हति म्हतिं हे उत्कृष्ट धइगु वःगु दु । मेखे मेपिं सुं दु कि धइगु न्ह्यसःया लिसलय् आःयात जि हे जक सक्षम खः मेपिंसं यक्व हे सय्केसीके ल्यं दनि धइगु लिसः वःगु दु ।

प्रधानमन्त्री पदय् सु नेवाः थ्यनीगु खः व ला स्वय् ल्यं हे दनि । उकिसनं गुगु दलं दय्कीगु धइगु नं स्पष्ट मजूनिगुलिं चाकडी वनीपिंत नं समस्या ब्वलनाच्वंगु तिकिझ्याःया सापारु संवाददातां कंगु दु ।

नेवाः कलाःपिसं घुर्की क्यंगु हुनिं लिपा प्रधानमन्त्री दय्केबलय् नेवाः कलाः मदुम्हेसित जक प्रधानमन्त्री दय्कीगु जूगु नं सापारु संवाददातां विशेष सूत्रं सीकूगु दु ।
Share on Google Plus

News: तिकिझ्याः न्यूज

    छ्याता
    फेसबुक छ्याता

0 comments:

Post a Comment