‘लाखाछेँ सानुकाजी लुमन्ति फुटसल धेंधेंबल्ला’ ख्वताबजिं त्याकल


११३७ बछलाथ्व २, २०७४ बैशाख १५, शुक्रबार

नेवाः पत्रकार राष्ट्रिय दबू, येँ जिल्लां ग्वसाग्वगु ‘लाखाछेँ सानुकाजी लुमन्ति फुटसल धेंधेंबल्ला’ इमेज च्यानलया ख्वताबजि कलाकार पुचलं त्या:गु दु ।

नेवाः पत्रकार राष्ट्रिय दबू, येँया मदुम्ह दाँभरी सानुकाजी महर्जनया लुमन्तिइ थौं ग्वसाग्वगु धेंधेंबल्लाखय् सुरेन्द्र तुलाधरया नायसुइ कुहाँवःगु ख्वताबजि पुचलं सुरेन्द्र मानन्धरया नायसुइ कुहाँवःगु इमेज च्यानलया हे समयबजि ज्याझ्वया पुचःयात फाइनलय् टाइब्रेकरय् बुकुसें शील्ड ल्ह्वंगु खः । कासा मुक्कं १५ गु मिनेट म्हितकुगु खःसा उगु ई दुने निगुलिं पुचलं २–२ गोल याःगु खः । अथेहे लियाँल्यू जुइत ताःलागु ग्वसाखलः नेवाः पत्रकार राष्ट्रिय दबू, येँ जिल्लां धासा नेवाः पत्रकार राष्ट्रिय दबूया यल जिल्ला पुचःयात ६–० बुकुगु खः ।


नेपालभाषा संकिपा समाजया गोलरक्षक सुरेन्द्र महर्जन सर्वश्रेष्ठ कासामि घोषित जुलसा समयबजि टिमया स्ट्राइकर प्रकाश महर्जन ११ गोल नापं दकलय् अप्व गोल कय्कुम्हसिया उपाधि त्याकल ।

धेंधेंबल्ला धुंका त्याःपिं सकल कासामिपिंत वरिष्ठ समाजसेवी नापं उद्यमी लक्ष्मण गमालं मेडल प्रदान यानादिलसा समाजसेवी बालकृष्ण महर्जनं प्रमाण पत्र हस्तान्तरण यानादिल ।

धेंधेंबल्लाखय् नेवाः पत्रकार राष्ट्रिय दबूया केन्द्र, येँ, यल व ख्वप कचा नापं इमेज च्यानलको ख्वताबजि व समयबजि अथेहे नेपालभाषा संकिपा समाज व नेवाः संकिपा राष्ट्रिय दबू याना प्यंगु पत्रकार व प्यंगु कलाकार पुचया ब्वति दुगु खः ।

नेवाः मिडिया कप फुटसल

नेवाः पत्रकार राष्ट्रिय दबू, येँ जिल्ला शाखां नेवाः मिडिया कप फुटसल नं ग्वसा ग्वइगु घोषणा याःगु दु । नेपालभाषा माध्यमं थीथी संचार गृहय् कार्यरत नेवाः पत्रकार दथुइ नेवाः मिडिया कप धेंधेंबल्ला ग्वसाग्वय्गु ज्याझ्वलय् न्ह्यथंगु दु ।

Share on Google Plus

News: Newa News

    छ्याता
    फेसबुक छ्याता