२०७४-०१-१६ शनिबाः
येँ, अन्तर्राष्ट्रिय नृत्य दिवसया लसताय् ६ म्ह नृत्य निर्देशकपिं सम्मानित जुगु दु ।
थौं नृत्य निर्देशक संघ नेपालं अन्तर्राष्ट्रिय नृत्य दिवसया लसताय ग्वसाग्वगु सम्मान नापं सांस्कृतिक ज्याझ्वलय् हुलाप्याखँया थीथी विधाय् योगदान ब्यूपिं ६ म्ह नृत्य निर्देशकयात सम्मान याःगु खः । ज्याझ्वलय् कथ्थक नृत्य विधापाखे मनोरन्जन जोशी, भरत नाट्यम विधाय् वीणा जोशी राजभण्डारी, लोक नृत्यय् स्याने बहादुर रानायात हंगु खः । अथेहे संकिपा नृत्यपाखे नृत्य निर्देशक राजु शाह र चर्यानृत्यय् यज्ञमान पति बज्राचार्ययात हंगु दु । अथेहे थीथी संकिपा, म्यूजिक भिडियोखय् नृत्य निर्देशन याना नापं संकिपा निर्देशन तकं यानादिम्ह नृत्य निर्देशन लागाय् न्हापाम्ह पाइलट हिमग्याप लामा टासीयात नं विशेष सम्मान ब्यूगु दु ।
उगु ज्याझ्वलय् नृत्य निर्देशकपिनिगु जिवनी नापंया संघया न्हापांगु स्मारिका तकं विमोचन याःगु खः । वरिष्ठ नृत्य निर्देशक भैरव बहादुर थापा, शताब्दि पुरुष संस्कृतिविद डा.सत्यमोहन जोशी व वरिष्ठ म्येच्वमि रत्नशमसेर थापां मंका कथं स्मारिका पितब्वयादिगु खः ।
ज्याझ्वलय् संघया नायः भुवनदास श्रेष्ठं नृत्य निर्देशक संघ नेपालया स्थापना दिवस श्रावण २६ गतेया दिंयात राष्ट्रिय नृत्य दिवस कथं न्याय्केगु घोषणा यानादिल । नुगःखँ तयादिसें वरिष्ठ नृत्य निर्देशक भैरवबहादुर थापा, संस्कृतिविद् डा.सत्यमोहन जोशी, वरिष्ठ म्येच्वमि रत्नशमसेर थापा, सांस्कृतिक संस्थानया महाप्रवन्धक राजेश थापां राज्यं नृत्य लागाय् बाँलागु संरक्षण बीमागुलि जोड बियादिल ।
ज्याझ्वलय् नृत्य सम्वद्ध थीथी संघसंस्थापाखें थीथी लोक, आधुनिक, चर्या, शास्त्रीय नापं हिपहप, बि बोइङ प्याखँ तकं क्यंगु खः ।
किपा: बुद्ध शरण शाही
0 Comments:
Post a Comment