नेवाः स्वायत्त राज्य मंकाः संघर्ष समितिया प्रेस वक्तब्य

नेवाः स्वायत्त राज्य मंकाः संघर्ष समितिं थ्व हे वइगु पोहेंलाथ्व नवमि, ११३७ सन्चरवाः खुनु यलय् न्हय्क्वःगु नेवाः एकता दिवस हने त्यनागु खँ सकसितं कनाच्वना । थ्व हे झ्वलय् नेवाः एकता दिवसया ज्याझ्वः, वर्तमान राजनीति व सामाजिक सरोकारया खँय् संघर्ष समितिया अवधारणा क्वय् न्ह्यथना कथं दुगु नं सकलसित कनाच्वना ।

१) नेवाः एकता दिवसया अवधारणा
क) संघीय लोकतान्त्रिक गणतन्त्र नेपाःया दुने नेवाः स्वायत्त राज्य सुनिश्चित यायेगु हे नेवाः स्वायत्त राज्य मंकाः संघर्ष समितिया मू आज्जु खः । थ्व आज्जु पुवंकेया निंतिं संघर्ष समितिं पोहेंलाथ्व नवमि, ११३० कुन्हु दशरथ रंगशालाय् लखंलख नेवाःत मुनाः नेवाः स्वायत्त राज्य घोषणा सभा यानाः नेवाःतय्गु माग व अवधारणा सार्वजनिक यासें संविधान सभा, राजनैतिक दलया नापनापं सकल सरोकारवालातय्गु ध्यानाकर्षण याकागु जुल । थ्व हे संघर्षया ऐतिहासिक न्हियात लुमंकाः दँय्दसं पोहेंलाथ्व नवमि कुन्हु नेवाः एकता दिवस हना वयाच्वनागु जुल । नेवाः दुनेया अनेकताय् एकता हयेगु तातुनाः सकल नेवाः छवाः खः धइगु घोषणा न्हापांगु नेवाः एकता दिवसय् जुउगु खँयात नं लुमंकुसें न्हय्क्वःगु नेवाः एकता दिवस हने त्यनागु जुल । नेवाः स्वायत्त राज्य प्राप्तिया निंतिं झी सकल नेवाः छधिइ छप्पँ जुयाः न्ह्याःवनेगु व नेवाः सरोकारया खँ थ्वयेकेगु थ्व दिवसया मू तातुना खः ।

२)     राजनैतिक अवधारणा
क) संघर्ष समितिया मू ज्या नेवाः स्वायत्त राज्य सुनिश्चित जूगु संविधान निर्माणया निंतिं संघर्ष यायेगु
खः । तर वंगु असोज ३ गते पितब्यूगु संविधानय् नेवाः स्वायत्त राज्य सुनिश्चित मजूगु व अन्तरिम संविधानय् ब्यवस्था जूगु आदिवासी जनजाति व उत्पीडित समुदायया अधिकारतकं क्वपालेगु ज्या जुल । उकिं थ्व संविधानयात असहमति क्यनाः नेवाः स्वायत्त राज्य चूलाकेत संघर्ष समिति न्ह्याःवना च्वनागु जुल । छुं न्हि न्ह्यः सरकारपाखें संसदय् न्ह्यब्वःगु संविधान संशोधन विधेयकय् नं झीगु माग दुमथ्याःगुलिं झीसं असहमति क्यनाः ज्याझ्वः न्ह्याकावया च्वनागु सकसिनं स्यूगु हे खँ खः । थ्व संशोधन विधयेक परिमार्जन यानाः आदिवासी नेवाःया पहिचान दुगु नेवाः स्वायत्त राज्य सुनिश्चित यायेमाः धयागु झीगु माग खः ।
ख) आन्दोलनया झ्वलय् नेवाःनापं आदिवासी जनजाति व राज्य दथुइ जूगु गुंगू (९) वुँदे सहमति व सम्झौता व इलय्ब्यलय् आदिवासी जनजाति व भाषाभाषीतनाप जूगु थीथी सहमति व सम्झौता कार्यान्वयन याकेमाः धइगु संघर्ष समितिया माग खः ।
ग) थौंकन्हय् संघीयता कार्यान्वयन यायेगु निंतिं स्थानीय निकाय पुनर्संरचना यायेगु ज्या न्ह्याकाच्वंगु खँय् नं नेवाः स्वायत्त राज्य मंकाः संघर्ष समितिया ध्यानाकर्षण जूगु दु । आदिवासी जनजातिया म्हसीका मस्यनीकथं जक स्थानीय तहया पुनर्संरचनाया ज्या यायेमाःगु, न्हू दयेकीगु स्थानीय निकायया नां नं स्थानीय म्हसीका न्ह्यब्वइकथं जुइमाः धइगु संघर्ष समितिया धारणा खः ।  
घ) संविधानसभाया राज्य पुनर्संरचना आयोगं न्ह्यब्वःगु अवधारणा व प्रदेशया ल्याःकथं राज्यया पुनर्संरचना यायेमाः धइगु संघर्ष समितिया माग खः ।
ङ) न्हूगु संविधान कार्यान्वयन याइगु झ्वलय् संविधानयात उपयोग यानाः गुलि फु उलि अप्वः नेवाः अधिकार कायेगु निंतिं दवावमूलक ज्याझ्वः न्ह्याका वनेगु झीगु रणनीति खः ।

३) सामाजिक सरोकारया खँय्
क) थौंकन्हय् नेपाल सरकारं लँ तबाला यायेगु नामय् स्वनिगलय् आपालं छेँ व भौतिक संरचना थुनेगुया लिसें जग्गा अधिकरण यायेगु ज्या यानाच्वंगु प्रति नेवाः स्वायत्त राज्य मंकाः संघर्ष समितिया गम्भिर ध्यानाकर्षण जूगु दु । लँ तबाला यायेगु ज्या बांलाःगु खःसां थुकिं उगु लागाया आदिवासीतय्गु जनजीवनय् बामलाक्क हे असर लाना च्वंगु दु । नेपाल सरकारया जग्गा प्राप्तिया ऐन, २०३४ य् व्यवस्था जूगु, संयुक्त राष्ट्र संघया मानव अधिकार सम्बन्धि घोषणा पत्र ९ग्ल्म्च्क्ष्ए० पाखें प्रत्याभुत यानातःगु भुमिया अधिकार नापं नेपाल सरकारं ल्हाचिं तयाः पारित यानातःगु अन्तराष्ट्रिय श्रम संगठनया महासन्धि १६९ कथं आदिवासीत बसोबास याना वयाच्वंगु भुमि वा जल, जमीन, जंगलय् गुगु नं कथंया विकास निर्माणया ज्या न्ह्याके न्ह्यः अमित सुसुचित यानाः अमिगु स्वतन्त्र सहमति कायेमाःगु व अमिगु प्रतिनिधिमुलक संस्थानापं सहलह यानाः जक यायेमाःगु मान्यतायात बेवास्ता याना ज्या न्ह्याकाच्वंगु प्रति नेवाः स्वायत्त राज्य मंकाः संघर्ष समितिया घोर आपत्ति दु ।
उगु हे मान्यताकथं आदिवासीत बसोबास यानावयाच्वंगु थाय् सरकारयात मालधाःसा स्थानीय आदिवासीतय्गु सहमति कयाः जक याय्माःगु व चलनचल्तिया बजारभाःकथं उचित मुआव्जा बिइगु वा अमित मेथाय् बसोबासया व्यवस्था यानाः वा भुमिया बदलाय् समान प्रकृति वा परिमाणय् मेगु भुमि उपलब्ध यानाः जक कार्यान्वयनय् वनेमाः । थ्वहे खँयात कयाः उपत्यकाव्यापी संघर्ष समितिं आह्वान याःगु स्वनिगः बन्दयात नेवाः स्वायत्त राज्य मंकाः संघर्ष समितिपाखें नं सक्रिय समर्थन यानाच्वना । थ्व ज्याझ्वः सफल यायेगु निंतिं सकल नेवाःत जायेत नं नेवाः स्वायत्त राज्य मंकाः संघर्ष समितिं इनाप यानाच्वना ।
ख) २०७२ बैशाख १२ गतेया तःभुखाय् लिपा ध्वस्त जूगु नेपाःया थीथी थाय्यालिसें स्वनिगःया सांस्कृतिक, धार्मिक व ऐतिहासिक सम्पदाया पुनर्निर्माणय् सरकारं यानाच्वंगु ढिलासुस्ती व कावलेगतिया निर्माण ज्या, अले जनताया पुनर्वासया व्यवस्थाय् सरकारं क्यनाच्वंगु उदासिनतापाखे नं संघर्ष समितिया ध्यानाकर्षण जूगु दु । भुखाय् ब्वयाः निगू चिकुला वनेधुंकाःतकं जनताया पुनर्वासया व्यवस्था मजूगु खं जनताप्रति सरकार गुलितक जवाफदेही जुयाच्वंगु दु धइगु क्यनाच्वंगु दु । सरकारं पुनःनिर्माण व पुनर्वासया व्यवस्थाया निंतिं उच्चप्राथमिकता बियाः न्ह्यायेमाः धइगु नं संघर्ष समितिया धारणा खः । झीगु धार्मिक, सांस्कृतिक सम्पदा पुलांगु स्वरुपय् हे दयेके माः । थुकिया निंतिं स्थानीय समुदायया सहभागीताय् पुनर्निर्माण जुइमाः धइगु मंकाः संघर्ष समितिया धारणा खः । अथेहे भूकम्पपीडित परिवारयात म्हतिं नं १० लाख अनुदान सरकारपाखें बीमाः धैगु संघर्ष समितिया माग खः ।
ग) येँया पुलांगु बसपार्कय् बसपार्क चिइकाः निर्माण जुइत्यंगु काठमाडौं भ्यू टावर निर्माण जुल धाःसा येँया खुल्ला थाय् अतिक्रमण जुयाः नकारात्मक लिच्वः लाइगुलिं थ्व ज्या दिकेमाःगु नेवाः स्वायत्त राज्य मंकाः संघर्ष समितिया माग खः । थथे हे नेवाः स्वायत्त राज्य पलिस्था मजूतले स्वनिगः दुने गुगुं नं थासय् ततःधंगु संरचना निर्माणया ज्या न्ह्याके मज्यू धइगु संघर्ष समितिया धारणा खः ।
अथेहे निगूगु चक्रपथ निर्माण जुइगु अवस्थाय् स्वनिगःया कृषिभूमि नष्ट जुइगु, आदिवासीत विस्थापित जुइगु व जनघनत्व अप्वयाः स्वनिगलं फये हे मफइगु अवस्था ब्वलनीगु जूगुलिं थ्व खँय् गम्भीररुपं बिचाः यानाः जक ज्या न्ह्याकेमाःगु संघर्ष समितिया माग खः ।

नेवाः एकता दिवसया ज्याझ्वः
१) पत्रकार मुना
न्हिल्याः ११३७ पोहेंलाथ्व चतुर्थी (पुस १८ गते)
थाय् झीगु भ्वय्छेँ रेष्टुरां, ज्याथा, येँ ।

२) घटक संस्थाया थःथःगु संस्था व लागाय् विशेष ज्याझ्वः
न्हिल्याः ११३७ पोहेंलाथ्व चतुर्थीनिसें अष्टमीतक (पुस १८ निसें २२ गतेतक)

३) स्वनिगःव्यापी प्रचारप्रसार व कोणसभा
न्हिल्याः ११३७ पोहेंलाथ्व षष्ठीनिसें अष्टमीतक (पुस २० निसें २२ गतेतक)

४) उपत्यकाव्यापी संघर्ष समितिया ग्वसालय् जुइगु स्वनिगः बन्दया सक्रिय समर्थन
न्हिल्याः ने.सं. ११३७ पोहेंलाथ्व षष्ठी (पुस २० गते) बुधवाः

५) मू ज्याझ्वः
न्हिल्याः ने.सं. ११३७ पोहेंलाथ्व नवमि (पुस २३ गते) शनिवाः
सुथसिया ११ः३० ताः इलय् यलया पूच्वय् मुनाः ¥याली
न्हिनसिया १ः०० ताः इलय् यलया मंगलबजारय् नेवाः एकता दिवस विशेष सभा



माइलाबाबु द्यःला
नायः
नेवाः स्वायत्त राज्य मंकाः संघर्ष समिति
ने.सं. ११३७ पोहेंलाथ्व चतुर्थी (पुस १८) सोमवार

Share on Google Plus

News: तिकिझ्याः न्यूज

    छ्याता
    फेसबुक छ्याता

0 Comments:

Post a Comment