‘मिस नेवाः ११३७’ जुइगु

 

११३७ थींलाथ्व ६, २०७३ मङ्सिर २० 

नेप्लिज फेशन होमं दँय्दसं ग्वसाग्वयाच्वंगु ‘मिस नेवाः ११३७’ घोषणा याःगु दु । सोमबार येँ ग्वसाग्वगु पत्रकार नापलाय्ज्याय् १२ क्वगु मिस नेवा घोषणा याःगु खः ।

पत्रकार नापलायेज्याया झ्वलय् मिस नेवाःया सल्लाहकार नापं प्राइम बैंकया उपमहाप्रबन्धक भाईराजा तुलाधरं नेप्लिज फेशन होमया हेमा मानन्धरं नेवाः संस्कृतिया संरक्षण र प्रवर्धनय् धिसिलाःगु भूमिका म्हितुगु न्ह्यथनादिल ।

मिस नेवाः ११३६ एन्जल श्रेष्ठं थः नेवाः म्हाय् मचा जुयानं मिस नेवालय् ब्वति कायेधुंका जक नेवाः संस्कृति बारे सीकेगु ह्वःता चूलाःगु न्ह्यथनादिल । मिस नेवाः जुइधुँका नाँ नापं नेवाः संस्कृति प्रवर्धन र संरक्षणय् युवापुस्तायात एकिकृत याना ज्या याये खंगु न्ह्यथनादिल ।


उगु ज्याझ्वलय् नेप्लिज फेशन होमया नायः हेमा मानन्धरं न्ह्यथन, ‘नेवाः संस्कृति थः हे धनी । थुकियात ल्यंकातयेत युवापुस्तायात हे आकर्षित यायेमा । अकें नेवाः संस्कृति, भाय्, वसः बारे युवापुस्तायात जानकारी याका संरक्षण पाखे समाजयात उन्मुख यायेत १२ दँ निसें मिस नेवाः धेंधेंबल्ला यानावयाच्वनागु दु ।’

थुगु धेंधेंबल्ला ज्याझ्वलय् नेवाः समुदायया १६दँ निसें २३दँ या वैशया ब्याः मजूपिं मयेजुपिंसँ ब्वति कायेज्यू । धेंधेंबल्लाखय् नेवाः समुदायपाखेँ हे ब्वति कायेमा । बा वा मा न्ह्याम्ह नेवाः जुसाँ ब्वति कायेदइ ।

थुगु धेंधेंबल्लाखय् ब्वति कायेत फारम नं चायेकुगु दु । मानन्धरया कथं नेप्लिज फेशन होमया ज्याकू डिल्लीबजार वा अनलाईनपाखें नं फारम कायेफइ । धेंधेंबल्लाया न्हापांगु चरणया अडिसन वैगु पुष २ गते जमल स्थित होटल यल्लो पगोडाय् जुइ ।

४२ म्ह तक ब्वति काय् दइगु धेंधेंबल्लाखय् ब्वति कापिंत लछि व बाछितक थीथी विधाय् प्रशिक्षण बिई  । इम्त आत्मविश्वास, आमसञ्चार, व्यक्तित्व विकाश, सामाजिक सेवा, नृत्य, फिटनेश नापंया शिप स्यनिगु न्ह्यथंगु दु ।

१२ क्वगु मिस नेवाः ल्ययेज्या वैगु माघया निगुगु वालय् येँया नेपाल प्रज्ञा प्रतिष्ठानया हलय् ग्वसा ग्वयेत्यंगु दु । धेंधेंबल्लाया कोरियोग्राफी रोजिन शाक्यं व प्याखँ कोरियोग्राफी रोहिया महर्जनं याइगु पत्रकार सम्मेलनय् न्ह्यथंगु खः ।



किपा: हिमालयनटाइम्स, बिआरतिनेपाल
Share on Google Plus

News: Newa News

    छ्याता
    फेसबुक छ्याता