गुरुङ राष्ट्रिय परिषदय् जंगबहादुर


असोक सुजन श्रेष्ठ, हेटौडा

११३७ थींलाथ्व ४ , २०७३ मङ्सिर १८ । 

हेटौंडा गुरुङ राष्ट्रिय परिषद (तमू ह्युल छोंज धीँ) मकवानपुर जिल्ला शाखाया न्हू समिति चयन जुगु दु । शनिबा: जुगु प्यक्वगु अधिवेशनं न्हू समिति चयन यागु खः । अधिवेशनं सर्वसम्मतं जंगबहादुर तमुया नायःसुइ १७ म्ह दुजया न्हू ज्यासना पुचः निस्वंगु खः ।

अधिवेशनं न्वकु दिपक तमु, छ्याञ्जे अमीर तमु, संगठन छ्याञ्जे रमेश तमु, प्रचार छ्याञ्जे नेत्रबहादुर तमु, दाँभरी सञ्जु तमु व ल्यू दाँभरी बबिता तमु ल्यःगु दु । अथेहे दुजःकथं चन्द्रबहादुर तमु, गोविन्द तमु, उर्मिला तमु, किकबहादुर तमु, पूर्णबहादुर तमु, सवनम तमु, सानु तमु, सरिता तमु, शोनी तमु व राजु तमु ल्यःगु दु ।

परिषदया कार्यवाहक नायः पुष्पबहादुर गुरुङया नायःसुइ व केन्द्रीय नायः रेशम गुरुङया मू पाहाँसुइ ज्याझ्व जुगु खः । मू पाहाँ नं जनजाति समुदाय नेतृत्वय् वये मफुगु न्हयथंसें लोभ लालच मदयेक नेतृत्वं इमानदार जुइमागु न्ह्यथनादिल । जनजाति समुदायलय् छुँ ई न्ह्यः तक नेतृत्व यायेफुम्ह मनुया अभाव जुगु न्ह्यथंसें गुरुङं आ नेतृत्व क्षमता विकास जुयाच्वंगु वाः चायेकादिल ।

केन्द्रीय नायः गुरुङं अन्तरिम संविधान स्वयाँ २०७३ सालया नेपाःया संविधन प्रतिगामी जुसां संविधान च्याकेहे मागु इ मजुगु न्हयथनादिल । संविधान संशोधनय् भाय्सम्बन्धी प्रस्ताव सकारात्मक जुगु दावी यासें नायः गुरुङं राजनीतिक दलया नकारात्मक हस्तक्षेपं जातीय पुचःयात प्रभावित याइगु न्ह्यथनादिल । गुरुङं राष्ट्रिय परिषदया ६५गु जिल्लाय् शाखा दुगु, ४० गु थीथी समाजत दुगु, विदेसय् १६गु थासय् शाखा दुगु न्ह्यथनादिल । २३ गु जिल्ला शाखा व २७ गु समाजया थःगुहे भवन तकं दुगु वयेकलं न्हयथनादिल ।


गुरुङ समुदाययात संगठित यायेत न्ह्यच्यूपिं ४ म्हसित हंगु ज्याझ्वलय् नेपाल आदिवासी जनजाति महासंघ मकवानपुर जिल्ला समन्वय परिषदया नायः तीर्थबहादुर थापा मगर, आदिवासी जनजाति पत्रकार महासंघ (फोनिज) या केन्द्रीय पार्षद सुरेश श्रेष्ठ, नेपाल तामाङ घेदुङ मकवानपुरया नायः लिलाकुमार घलान, नेवा देय् दबुया न्वकु अनिल खड्गी नापंया उपस्थिति दुगु खः ।



Share on Google Plus

News: Newa News

    छ्याता
    फेसबुक छ्याता

0 comments:

Post a Comment