संविधान हाकनं च्वकेत दबाव बीगु धासें मधेसीनापंया २७ गु दलं न्हूगु आन्दोलन ज्याझ्वः घोषणा यागु दु । घोषित ज्याझ्वलय् जिल्ला प्रशासन ज्याकूथी हाकु ध्वाँय् क्यनेगु निसेँ सिंहदरबार घेरेदयायेगु तकं दु ।
संघीय समाजवादी फोरमया ज्याकू तीनकुनेय् ग्वसाग्वगु पत्रकार तकेलनय् आन्दोलन घोषणा यागु खः । आन्दोलनकारी दलया पुचयात ‘संघीय गठवन्धन’ नां ब्युगु दु । वैगु वैशाख १५ निसें यायेत्यंगु न्हापांगु चरणया आन्दोलन जेठ १ गतेतक न्ह्याइ ।
वैशाख १५ गते फुक्क जिल्ला प्रशासन ज्याकू पाखेँ सरकारयात ज्ञापनपत्र लःल्हायेगु, १७ गते सरकारी ज्याकूथी हाकुगु ध्वाँय् क्यनेगु, १९ गते मू मू सहरय् जनप्रदर्शननापं मजदुर दिवस न्यायेकेगु गठवन्धनया आन्दोलन ज्याझ्वलय् न्हयथनातगु दु । वैशाख २१ निसें ३१ ग्ते तक देःया थीथी थासय् विरोध सभात तःगु दु । लिपांगु दिं जेठ १ गते सिंहदरबार घेरे यायेगु ज्याझ्वः तय यागु दु । देन्यंकं आयोजना याइगु विरोध ज्याझ्वलय् ‘जेठ १ गते वने सिंहदरबार पने’ नारायात अभियान कथं यंकिगु विज्ञप्तिइ न्हयथनातगु दु ।
विज्ञप्तिइ ल्हाचिं तयेगुलि संघीय समाजवादी फोरम नेपालया नायः उपेन्द्र यादव, तमलोपाया नायः महन्त ठाकुर, सद्भावना पार्टीया नायः राजेन्द्र महतो, तराई मधेस सद्भावना पार्टीया नायः महेन्द्र राय यादव पिं दु । अथेहे राष्टिय मधेस समाजवादी पार्टीया नायः शरत् सिंह भण्डारी, आदिवासी जनजाति राष्ट्रिय आन्दोलनया संयोजक पद्मरत्न तुलाधर, संघीय लिम्बुवान पार्टीया नायः कुमार लिङ्देन, नेपाः राष्ट्रिय पार्टीया महासचिव विजय सैंजु, थारुवान मंका संघर्ष समितिया नायः होरीलाल चौधरी नापंयापिं दु ।
पत्रकार सम्मेलनय् संघीय समाजवादी फोरमया नायः उपेन्द्र यादवं न्हापांगु चरणया आन्दोलनय् सरकार व स्वंगु दलया लिसः स्वया ल्यंगु ज्याझ्वः तय यायेगु न्ह्यथंगु दु ।
0 Comments:
Post a Comment