येँया पुलांगु बसपार्क खुल्लामञ्चय् तयेत्यंगु दु । काठमाडौँ टावर देके मसिधतले पुलांगु बसपार्कय् वइगु व वनिगु सवारीया व्यवस्थापन खुलामञ्चं यायेत्यंगु दु । येंया पुलांगु बसपार्कय् देकेत्यंगु उगु टावरया देकेज्याया इलय् जक खुलामञ्चय् यातायातया साधन तइगु येँ महानगरपालिकां न्ह्यथंगु दु ।
आ खुलामञ्चय् जस्ता तयेगु ज्या जुयाच्वंगु व उगु ज्या क्वचायेधुंका यातायातया साधनयात स्थानान्तरण याना टावर देकेज्या न्ह्याइगु येँ महानगरपालिका प्रवक्ता ज्ञानेन्द्र कार्कीं न्ह्यथनादिल ।
टावर देकेगु योजना भ्वखाय् न्ह्यः हे वःगु जुसां भ्वखाय् लिपा टावरया संरचना हिलेमागुलिं देकेज्या लिबागु न्ह्यथंगु दु । भ्वखाय् न्ह्यः योजना कथं टावर २९ तल्ला खःसा भ्वखाय् लिपा भवन निर्माणया मापदण्ड हिउपा जुगुलिं टावर पूवंक भ्वखाय् प्रतिरोधात्मक देकेत्यंगु दु । आ १२ तल्ला जक देकेगु नक्सा स्वीकृति ब्युगु दु । प्रस्तावित सुविधा सम्पन्न टावरया विस्तृत अध्ययन प्रतिवेदन (डिपिआर) व वातावरणीय प्रभाव मूल्याङ्कन तकं देकेधुंकुगु दु ।
थुगु टावर देकेत मुक्कं रु ३ अर्ब ५० करोड तका तुइगु महानगरपालिकां धुकुमां यागु दु ।
0 Comments:
Post a Comment