ज्यापु महागुथिया स्वक्वःगु तःमुँज्या


ज्यापु महागुथिया स्वक्वःगु तःमुँज्याया थौं शनिवाः बसन्तपुली प्रधानमन्त्री सुशील कोइरालां उलेज्या यानादीगु दु। वय्कलं नेपाया शान्ति, स्थायित्व व अमनचयनया नितिं छगू जक विकल्प लोकतान्त्रिक संविधान जूगु न्ह्यथनादिल । नेपाःमितसें दच्छिया दुने संविधान दयेकी धका बिउगु अभिमतयात उच्च सम्मान यासें संविधान दयेकेगु नितिं फुक्क न्ह्यज्यायेमाःगु न्ह्यथनादिल । सहमति सहकार्य व एकताया सिद्धान्तयात आत्मसात याना संविधान दयेकेगु अभियानय् न्ह्यज्यायेत फुक्क राजनीतिक दलयात इनाप यासें प्रधानमन्त्री कोइरालां संविधान दयेकेगु व विकास यायेगु नापनापं यंकेत सरकार प्रतिबद्ध जूगु न्ह्यथनादीगु दु ।

नेपाः बहुजातीय, भाषाभाषी दुगु दे जूगु चर्चा यासें अनेकताय् एकता दुगु नेपाःया विशिष्टता ख: व नेपाःया सामाजिक, साँस्कृतिक उत्थानय् ज्यापू समुदायया महत्वपूर्ण भूमिका दुगु प्रधानमन्त्री कोइरालां न्ह्यथनादिल । वय्कलं थी थी जातजाति, भाषाभाषी दथुइ एकता सदभाव कायम यायेत ज्यापु समुदायं महत्वपूर्ण भूमिका म्हितेमाःगु खँय् बः बियादील ।

ज्यापु महागुथिया नितिं भवन दयेकेगु, बाजं संरक्षण नापं ज्यापु संग्रहालयया नितिं सरकारलिसे तगु मागय् थः सकारात्मक जूगु व उकिया कार्यान्वयनया नितिं ग्वाहालि यायेगु नं न्ह्यथनादिला ।

ज्यापु समुदायपाखें संगठन समितिया कजि राजभाई जकःमिं "पहिचानया नितिं अधिकारसहितया संविधान" ज्यापु महागुथिया माग जूगु धयादिल ।

ज्याझ्वलय् ज्यापु महागुथिया स्थापना व विकासय् महत्वपूर्ण ग्वाहालि यानादीपिं विपेन्द्र महर्जन, देब बहादुर डंगोल व ई. मोहनकृष्ण डंगोल लिसेंयात ज्यापु महागुथियापाखें प्रधानमन्त्री कोइरालां हनादीगु ख: ।

किपा: नेपालन्यूज़
बुखँ: रसस
Share on Google Plus

News: Anonymous

    छ्याता
    फेसबुक छ्याता

0 Comments:

Post a Comment