नेवाः भाय्या जक सफू मीगु मंकाः पसःया उलेज्या

manka dhuku
नेपालभाषां पिहां वइगु सफू व पत्रपत्रिका जक मीगु पसः चायेकूगु दु । थनया कुलांभुलुइ च्वसापासाया छेँय् ‘मंकाः सफू पसः’ नां तयाः चायेकूगु उगु पसःया उलेज्या सफूधुकूया थुवाः नातिवज्र वज्राचार्यं यानादीगु खः । भाजु नातिवज्रं थनिं न्यय्दँ न्ह्यः असं दगु– बहालय् थुकथंया हे नेवाः भाय्या जक सफू चायेकादीगु खः । 
ज्याझ्वलय् भाजु नातिवज्र–यात वय्कलं नेवाः भाय्या जक सफू पसः चायेकाः यानादीगु योगदानया कदर यासें मूपाहां च्वसा–पासाया नायः भाजु पद्मरत्न तुलाधरं दोसल्लां न्ययेकाः हनादीगु खः । ज्याझ्वलय् न्ववासें नातिवज्रजुं थनिं न्यय्दँ न्ह्यः थम्हं यानागु ज्यायात निरन्तरता बी कथं थौं मंकाः पसः नामं मेगु पसः चाःगु व उकिया उलेज्या थम्हं याये खनाः थःत कर्म खंका थें ताःगु खँ कनादिल ।
मूपाहां पद्मरत्न तुलाधरं नेवाः भाय्या सफू न्याये मीगु व उकिया चर्चा परिचर्चा यायेगु लागिं थ्व पसलं तिबः बीगु तायादिसें च्वसापासाया क्यबय् साहित्यिक ज्याझ्वः यायेत खलः पुचःतय्त इनाप यानादिल । 
मंकाः धुकू बचत तथा ऋण सहकारीया नायः रमेशकाजी स्थापितं  भाषा व साहित्य ख्यलय् न्ह्याबलें छुं यानाच्वनेगु उद्देश्य कथं थ्व पसः चायेकेगु ज्या यानागु खँ कनादिल । 
मंकाः पसःया कजि रमेशमान पियाया सभापतित्वय् जूगु उगु ज्याझ्वलय् मंकाः धुकूया दुजः राजा शाक्यं लसकुस यानादीगु खः । 
सफू उलेज्याया न्हापांगु न्हि पाहांपिंसं लाइन च्वनाः सफू न्यानादीगु खः । छन्हुं हे उगु पसलं ४७ द्वः तकाया सफू मीगु ज्या जूगु खः ।

Share on Google Plus

News: Newa News

    छ्याता
    फेसबुक छ्याता