ताम्राकार समाजया भिन्तुना किलबिल व स्मारिका बिमोचन


ताम्राकार कुलदेवता उग्रचण्डी माई संरक्षण समितिया ग्वसालय् नकतिनि हे जूगु छगू ज्याझ्वःया दथुइ न्हूदँ ने.सं. ११३४ या लसताय् समितिं पिथंगु स्मारिका विमोचन यायेगु दु । ज्याझ्वलय् समाजसेवी व पूर्व मन्त्री बुद्धिरत्न बज्राचार्य व ललितपुर उपमहानगरपालिकाया प्रमुख व कार्यकारी अधिकृत मोहननाथ मास्कें उगु स्मारिका विमोचन यानादीगु खः ।

नेपाःया मौलिक राष्ट्रिय संवत् नेपाल संवत्या भिंतुना कालबिल यायेगु झ्वलय् लसकुस न्वचु बियादिसें ताम्रँकार समाजया नायः रविन्द्रराज ताम्राकारं थज्याःगु ज्याझ्वलं जातीय एकता बल्लाकीगु खँ कनादिल । ज्याझ्वलय् न्ववानादिसें नायः ताम्राकारं सरकारं राष्ट्रिय संवतया मान्यता बीधुंकूगु जूगुलिं थुगु संवत् छ्यलाबुलाय् हयेगु निंतिं छगू अभियान हे न्ह्याकेमाःगु आवश्यकता दु धयादिल ।

उगु हे ज्याझ्वलय् न्ववासें पुर्व मन्त्री बज्राचार्यं, कायृकारी अधिकृत मास्केलगायत नेवाः देय् दबूया नायः नरेश ताम्राकार, ज्यापु समाज यलया नायः मंगल महर्जन, नेपालभाषा मंकाः खलः यलया नायः किरण शाक्यपिंसं वर्तमान आवस्थाय् मुलुक सम्मानित जुइगु लागि पहिचान सहितया राज्य आवश्यक जूगुलिं आः जुइत्यंगु निक्वःगु संविधानसभाया निर्वाचनय् थुगु विषयय् गम्भीर जुयाः न्ह्यांवनेमाःगु खँय् बः बियादिल ।

उग्रचण्डी परिसरय् जूगु उगु ज्याझ्वलय् ललितपुर जिल्लाया प्रमुख जिल्ला अधिकारी शशि शेखर श्रेष्ठ, ललितपुर वरिष्ठ प्रहरी उपरीक्षक रमेश भट्टराई, ललितपुर उद्योग वाणिज्य संघया नायः अजरमान जोशीलगायत ललितपुरया थीथी समाजया नायः व प्रतिनिधितय्गु उपस्थिति दुगु खःसा बाराही, शिल्पकार, राजकर्णिकार, सिकर्मी, राजोपाध्याय समाजया नायःपिंसं नं थःथःगु बिचाः प्वंकादीगु खः ।

ताम्राकार समाजया न्वकु विनोद ताम्राकारं सुभाय् देछायादीगु उगु ज्याझ्वलय् इटालीं विश्व भ्रमणय् साइकल यात्री डानियलयात सगं बियाः भिंतुना देछायेगु ज्या नं जूगु खः । 
Share on Google Plus

News: Newa News

    छ्याता
    फेसबुक छ्याता